უკრაინაში ჩეჩენი სამხედროების დიდი დანაკარგის გამო, ჩეჩნეთში არაოფიციალურად აკრძალეს ქორწილების მასშტაბურად აღნიშვნა, – ამის შესახებ ინფორმაცია „რადიო თავისუფლებას“ საკუთარი პროექტის ფარგლებში ჩეჩნეთიდან ორმა წყარომ აცნობა.
მათი ინფორმაციით, მიუხედავად იმისა, რომ ოფიციალური მითითება არ არსებობს, გადაწყვეტილება მიღებულია იმაზე დაყრდნობით, რომ „ასე ფიქრობს ფადიშაჰი“, ანუ ჩეჩნეთის მეთაური რამზან კადიროვი.
Кавказ.Реалии-ს წყაროების ინფორმაციით, ბოლო დღეებში ჩეჩნეთში დაკრძალეს უკრაინაში დაღუპული კიდევ სამი „კადიროველი“, რომლებიც რუსული არმიის ჩეჩნურ ქვედანაყოფში მსახურობდნენ.
გამოცემის წყაროთა თანახმად, უკრაინაში საომარი მოქმედებებისას მოკლულია ჩეჩნეთის 60-მდე მცხოვრები. თავად კადიროვმა მხოლოდ ერთხელ, 1-ელ მარტს განაცხადა, რომ უკრაინაში ორი ჩეჩენი მებრძოლი დაიღუპა.
ჩეჩნეთში ხალხმრავალი ქორწილების არაოფიციალურად აკრძალვის შესამოწმებლად Кавказ.Реалии-ს კორესპონდენტი გროზნოში დაუკავშირდა ხუთ საბანკეტო დარბაზს, სადაც ასეთი წვეულებები იმართება. ჟურნალისტს ხუთიდან ოთხში არ უპასუხეს, ერთგან კი უთხრეს, რომ მზად არიან მხოლოდ 50-მდე სტუმრის მისაღებად, რაც ადგილობრივი ტრადიციის გათვალისწინებით, საკმაოდ ცოტაა.
ჩეჩნეთის ადგილობრივი ხელისუფლება ქორწილების არაოფიციალურად აკრძალვაზე კომენტარს არ აკეთებს.
კომენტარები