“ყველა პატიმარს აქვს დარღვეული კომფორტი” – ასე პასუხობს პრემიერი ირაკლი ღარიბაშვილი საქართველოს მესამე პრეზიდენტის, მიხეილ სააკაშვილის ჯანმრთელობის საგანგაშო მდგომარეობის შესახებ დასმულ კითხვას.
“მე გითხარით, რომ პატიმარზე საუბარს არ ვაპირებ. ნებისმიერი კითხვით შეგიძლიათ, მიმართოთ პენიტენციურ სამსახურს. 24 საათის განმავლობაში ყველა პატიმარს უტარდება მონიტორინგი, კვლევა, აქვს სრული კომფორტი არა ისეთი, როგორიც სააკაშვილის დროს იყო, როცა პატიმრებს აუპატიურებდნენ, სცემდნენ და კლავდნენ პირდაპირ. არამედ იქ არის შექმნილი სრული კომფორტი, ნორმალური პირობები, კვება – შესანიშნავი. ასე რომ, არავითარი კითხვა არ უნდა არსებობდეს. გასაგებია მოვისმინეთ, წუხილი რომ პატიმარს თურმე რაღაც კომფორტი დაერღვა. ყველა პატიმარს აქვს დარღვეული კომფორტი, იმიტომ, რომ შეზღუდული აქვს თავისუფლება, ბუნებრივია ეს”, – ამბობს ის.
ცნობისთვის, საქართველოს მესამე პრეზიდენტის, მიხეილ სააკაშვილის სიცოცხლე საფრთხეშია. ის დახმარების გარეშე ვეღარ გადაადგილდება, რაც იმას ნიშნავს, რომ სავარაუდოდ, ვეღარ მოახერხებს სასამართლო პროცესებზე დასწრებას, ასევე, ციხეში პაემნების ოთახში გასვლას.
ამასთან დაკავშირებით დღეს, პარლამენტის შენობასთან, 15:00 საათზე, სხვადასხვა სამედიცინო ასოციაციის წარმომადგენელი მედიკოსები, ასევე, მესამე სექტორის წარმომადგენლები და რიგითი მოქალაქეები შეიკრიბებიან. ისინი ერთობლივ განცხადებას გააკეთებენ.
კომენტარები