“შენობა, რომელშიც ოკუპანტების მაღალჩინოსნებს შეკრება ჰქონდათ – აფეთქდა” – გიორგი კობერიძე

– დღეს რუსებმა შვეულმფრენებთან ერთად სუ-34 გამანადგურებელ-ბომბდამშენი დაკარგეს. ხარკივის რაიონში რუსები ფრენას ძალიან ლიმიტირებულად ახორციელებენ. პრაქტიკულად ამ მიმართულებით უკრაინამ ცის დახურვა შეძლო. გარდა ამისა, ამ ტიპის ავიაციის დაკარგვა რუსეთისათვის 80 მილიონამდე ზარალთან ერთად პილოტების დაკარგვაცაა, რომელთა დეფიციტსაც რუსეთი ამ ომში განიცდის. ამასთან, რუსეთს ფურცელზე სულ 131 ცალი სუ-34 ჰყავდა ომის დაწყებისას. მათი რეალური რაოდენობა და ოპერატიულობა ბევრად ნაკლებია. პილოტების დეფიციტი ცალკე საკითხია. ომის დაწყებიდან დღემდე უკვე 8 სუ-34 დაკარგა რუსეთმა. ცხადია ისიც, რომ რუსეთი ბოლო თვითმფრინავამდე ვერ აწარმოებს გაფრენას და საბოლოოდ მსგავსი თვითმფრინავების გარეშე ვერ დარჩება. შესაბამისად, თითოეული ჩამოგდებული სუ-34 რუსეთის საჰაერო პოტენციალის მნიშვნელოვან დაქვეითებას გულისხმობს.

– რუსებმა დაბომბეს რკინიგზა დასავლეთ უკრაინაში – ლვივსა და რივნეში. ეს იყო არამხოლოდ თავდასხმა უკრაინულ სამოქალაქო ინფრასტრუქტურაზე, არამედ მინიშნება დასავლელი ლიდერებისათვის – რომლებიც კიევში მატარებლით მიემგზავრებიან ხოლმე – რომ რუსეთს შეუძლია ძალა ყველას და ყველაფრის წინააღმდეგ გამოიყენოს. თუმცა, რაც უფრო მეტად იმუქრება და ფართხალებს რუსეთი მით უფრო ნაკლებ საშიში ხდება იგი.

– ლუგანსკის რაიონში რუსებმა წინ წაწევა შეძლეს. მათ მთლიანად გაანადგურეს პატარა ქალაქი ნოვოტოშკივსკი. არცერთი სახლი აღარ არის მთელი. რეალურად ნოვოტოშკივსკი უკვე ნაქალაქარია. რუსები ჩრდილოეთიდანაც ძალიან მიუახლოვდნენ ქალაქ ზოლოტოეს, რომელზეც 2015 წლიდან გადის ფრონტის ხაზი ლუგანსკის რაიონში.

– გუშინ დონეცკი-ზაპორიჟიას საზღვართან ქალაქ ველიკაია ნოვოსილკასთან რუსული შეტევა სრულად იქნა მოგერიებული. დღეს რუსებმა ამ მიმართულებით განაახლეს შეტევა და ქალაქის დასავლეთით დიდი რაოდენობით უყრიან სატანკო ნაწილებს თავს. ეს კი შეიძლება დონეცკის რაიონში უფრო ღრმად შეჭრის წინაპირობა იყოს (ოღონდ სამხრეთ-დასავლეთის, ანუ ზაპოროჟიეს მხრიდან) ან უშუალოდ ქალაქ ზაპორიჟია გახდება მათი შეტევის სამიზნე. ამ მიმართულებით სტეპია და მისი გავლა სატანკო ნაწილებს თეორიულად შეიძლება უფრო მეტად გაუადვილდეთ, ვიდრე მთიანი რელიეფის ან ურბანული დასახლებების, მაგრამ უკრაინელები შეტევის მოგერიებისათვის მზად არიან.

– ლუგანსკის რაიონის ქალაქ კრემინაში, რომელიც რუსებმა რამდენიმე დღის წინ დაიკავეს, შეკრება ჰქონდათ ოკუპანტებისა და სეპარატისტების მაღალჩინოსნებს. ბევრი მათგანისათვის ეს უკანასკნელი შეხვედრა გამოდგა – შენობა, რომელშიც ისინი იმყოფებოდნენ აფეთქდა.

– უცნობია არის თუ არა რაიმე კავშირი უკრაინაში რუსეთის აგრესიასთან, მაგრამ მოლდოვას სეპარატისტულ-ოკუპირებული რეგიონის, დნესტრისპირეთის მთავარ ქალაქ ტირასპოლში უშიშროების შენობა აფეთქდა.

– უკრაინელებმა მცირედით წაიწიეს წინ ხერსონის რაიონში, უშუალოდ ქალაქი ხერსონის მიმართულებით. დეტალები გაურკვეველია, მაგრამ აშკარაა, რომ ბოლო 48 საათის განმავლობაში უკრაინული ნაწილები მოსვენებას არ აძლევენ რუსულ ძალებს ამ მიმართულებით.

– წუხელ აშშ-ს სახელმწიფო მდივანი თავდაცვის მდივანთან ერთად კიევში იმყოფებოდნენ. ორი მათგანის მხრიდან გაკეთდა ძალიან ნათელი განცხადება, რომ აშშ უკრაინას დაეხმარება ომში გამარჯვებაში ხოლო რუსეთი დასუსტდება ისე, რომ მან ვერანაირი აგრესია ვეღარ განახორციელოს. იქმნება პრეცედენტი რომელიც ყველა აგრესორს დაამახსოვრდება, სანამ რაიმე აგრესიას განახორციელებდეს.”