“ბიბილოვი გამოცხადდეს დამნაშავედ და მასზე ძებნა გამოცხადდეს” – დავითაია სამართალდამცავებს მიმართავს

პარტია „ევროპელი დემოკრატების“ თავმჯდომარე პაატა დავითაია ანატოლი ბიბილოვის განცხადებას ეხმაურება. 

პაატა დავითაია სამართალდამცავ სტრუქტურებს მიმართავს, რომ  ბიბილოვი გამოცხადდეს დამნაშავედ და მასზე ძებნა გამოცხადდეს, როგორც საქართველოს კონსტიტუციის დამრღვევი.

„მას შემდეგ, რაც რუსეთმა უკრაინაში სამხედრო მიზანს ვერ მიაღწია, თავისი მარცხის ნაწილობრივ გადასაფარად, ახალი ტერიტორიების „შემოერთების“ მიზნით იმ პროვოკაციული გეგმის შესრულება დაიწყო, რაზედაც რუსეთის ფედერაცია დიდი ხანია მუშაობს. საქართველოს ხელისუფლების მიერ მაქსიმალურად სწრაფად უნდა მოხდეს რეაგირება და გაკეთდეს მკვეთრი მესიჯი, რომ არ დავუშვებთ ჩვენი ტერიტორიების ანექსიას. ბიბილოვის პროვოკაციული განცხადების შესახებ საქმის კურსში უნდა ჩავაყენოთ ჩვენი პარტნიორები.

სამართალდამცავი სტრუქტურების მიერ უნდა გაიცეს სანქცია ე. წ. სამხრეთ ოსეთის პრეზიდენტზე, რომ მან, როგორც ძებნილმა და დამნაშავემ, რომელიც არღვევს საქართველოს კონსტიტუციურ წყობას, ვერ მოაწეროს ხელი დაგეგმილ ანექსიაზე. ეს იქნება სამართლებრივი საფუძველი, თუ როგორ თანამშრომლობს რუსეთის ფედერაცია კრიმინალებთან, რომელიც გამოყენებული იქნება როგორც კიდევ ერთი მტკიცებულება, რუსეთის ფედერაციის წინააღმდეგ ჰააგის სისხლის სამართლის საერთაშორისო სასამართლოში”, – აცხადებს პაატა დავითაია.

შეგახსენებთ, ოკუპირებული სამხრეთ ოსეთის ე.წ. ლიდერს, ანატოლი ბიბილოვი რეფერენდუმის ჩატარებას გეგმავს.

მიმაჩნია, რომ რუსეთთან გაერთიანება ჩვენი სტრატეგიული მიზანი, ჩვენი გზა, ხალხის მისწრაფებაა. ჩვენ ამ გზაზე ვივლით. უახლოეს მომავალში მივიღებთ შესაბამის სამართლებრივ ზომებს. სამხრეთ ოსეთის რესპუბლიკა იქნება მისი ისტორიული სამშობლოს – რუსეთის ნაწილი”. – თქვა დე ფაქტო ლიდერმა ბიბილოვმა.