“კვალზე ვართ გასულები” – საიდან დაინფიცირდა მარნეულელი ქალი

დაავადებათა კონტროლის ეროვნული ცენტრის დირექტორის მოადგილე, პაატა იმნაძე მარნეულიდან თბილისში გადაყვანილ, ინფიცირებულ პაციენტზე საუბრობს.

იგი აცხადებს, რომ COVID 19-ით დაავადებული პაციენტის, 62 წლის ქალბატონის ინფიცირების წყაროს ჯერ ვერ მიაგნეს, თუმცა გარკვეულ კვალზე გავიდნენ. ამის შესახებ იმნაძემ გადაცემაში “ღამის მთავარი” ისაუბრა.

“ლაპარაკი არ არის 20 ათას კონტაქტზე, კონტაქტი არის სულ 90 ადამიანი, ყველა ეს კონტაქტი შესწავლილია. აქ ლაპარაკია პრევენციულად გაცილებით მეტი ადამიანის გამოკითხვაზე, გაცილებით მეტი ადამიანის ჯანმრთელობის მდგომარეობის გადამოწმებაზე, რადგანაც ჩვენთვის უცნობი იყო და დაზუსტებით დღემდე არ ვიცით, თუმცა კვალზე ვართ გასულები, ინფიცირების წყარო რა იყო ამ ქალბატონის. აქედან გამომდინარე, ოჯახის წევრებიდან 4-ს დაუდასტურდა, კიდევ არის აღებული ახლო კონტაქტში მყოფი რამდენიმე ადამიანებისგან ნიმუში. ოჯახის წევრები ბევრი იყო გამოკვლეული და მხოლოდ 4-ს დაუდასტურდა. იქ ყველა სამუშაო ტარდება, რომ თუ იქ ვინმე არის ინფიცირებული, აუცილებლად დადგინდეს.

სხვათა შორის, მინდა ავღნიშნო, რომ “ჯეო ჰოსპიტალსის” ექიმმა, რომელმაც ჩვენ ეს შემთხვევა შეგვატყობინა, იმოქმედა ყველა სტანდარტის და წესის დაცვით. როგორც კი პაციენტს დაუმძიმდა პნევმონია და გახდა მძიმე, მწვავე რესპირაციული სინდრომი, ექიმმა მაშინვე შეგვატყობინა,”-განაცახადა პაატა იმნაძემ.