როგორც ამერიკული გამოცემა, The Washington Post-ი წერს, NATO-ს ქვეყნები უკრაინისთვის რუსული წარმოების С-300-ის ტიპის საზენიტო-სარაკეტო კომპლექსის გადაცემის შესაძლებლობას განიხილავენ. პარალელურად, ამერიკელი კონგრესმენები ბაიდენის ადმინისტრაციას С-300-ის საჰაერო თავდაცვის სისტემის უკრაინისთვის გადაცემისკენ მოუწოდებენ.
აქამდე, ბაიდენის ადმინისტრაციამ უარი თქვა პოლონეთისგან მიეღო МиГ-29-ები, რომლებიც შემდეგ უკრაინაში უნდა გაეგზავნათ. პენტაგონმა გადაწყვეტილება გაამართლა იმით, რომ უკრაინისთვის “МиГ-29-ების გადაცემის სარგებელი არის დაბალი” და მათი გაგზავნა “არ შეცვლის უკრაინის საჰაერო ძალების ეფექტიანობას”. ამ გადაწყვეტილებას მოჰყვა ამერიკელი, როგორც რესპუბლიკელი, ასევე დემოკრატი სენატორების კრიტიკა. პარასკევს, 11 მარტს ორივე პარტიის სენატორებმა პრეზიდენტ ბაიდენს გაუგზავნეს წერილი, რომელშიც ითხოვდნენ, რომ უკრაინისთვის გადაეცათ თვითმფრინავები და უპილოტო საფრენი აპარატები.
რადგან რუსეთს საჰაერო უპირატესობა აქვს, გამანადგურებლებს თავად უკრაინა ითხოვდა. ამას გარდა, კიევს სურდა NATO-ს უკრაინის თავზე ცა ჩაეკეტა, რაზეც დასავლეთისგან უარყოფითი პასუხი მიიღეს, რადგან ეს რუსულ საჰაერო ძალებთან პოტენციურ კონფრონტაციას ნიშნავდა. ცის ჩაკეტვის ალტერნატივად უკრაინაში საჰაერო თავდაცვის სისტემების მიწოდებას მიიჩნევდნენ. უკრაინული საჰაერო თავდაცვის სისტემების ნაწილის რუსეთის თავდასხმის პირველ დღეს განადგურდა.
როგორც The Washington Post-ი წერს, მათთან ამერიკელმა ოფიციალურმა პირმა თქვა, რომ ბაიდენის ადმინისტრაცია დასავლელ პარტნიორებთან მუშაობს, რათა უკრაინას საჰაერო თავდაცვის სისტემები და სხვა იარაღები მიაწოდონ.
ჯერ კიდევ მაშინ, როდესაც აშშ-ს თავდაცვის მდივნის, ლოიდ ოსტინის ბრიუსელსა და სლოვაკეთში ვიზიტი დაიგეგმა, მიმდინარეობდა მოლაპარაკებები იარაღის მიწოდებასთან დაკავშირებით. ოსტინი ბრიუსელში NATO-ს წევრების წარმომადგენლებს შეხვდება. ამას გარდა, სლოვაკეთი არის ჩრდილოატლანტიკური ალიანსის ერთადერთი ქვეყანა, რომელსაც ოსტინი განცალკევებულ ფორმატში, ორმხრივი საუბრების ფარგლებში ეწვევა. აქამდე, სლოვაკეთმა, NATO-ს კიდევ ორ წევრთან, პოლონეთთან და რუმინეთთან ერთად, მეზობელი უკრაინისთვის იარაღით დახმარების სურვილი გამოთქვა.
სწორედ სლოვაკეთის არმიის მფლობელობაში არის რუსული წარმოების С-300-ის საზენიტო-სარაკეტო კომპლექსი, რომელიც განკუთვნილია საჰაერო თავდაცვისთვის. მნიშვნელოვანია ის ფაქტორი, რომ უკრაინელ სამხედროებს ამ სისტემასთან მუშაობის გამოცდილება აქვს. ერთ-ერთი მთავარი სირთულე, უკრაინისთვის იარაღის მიწოდებაში არის ის, რომ მათ სჭირდებათ ისეთი სისტემები, რომლის გამოყენებაც იციან და მათ მუშაობაში მოსაყვანად გადამზადება არ დასჭირდებათ, რისი დრო და გარემოც ფიზიკურად არ არსებობს.
როგორც WP წერს, მათთან საკითხში ჩახედულმა ევროპელმა ოფიციალურმა პირმა თქვა, რომ უკრაინამ С-300-ის სისტემა ითხოვა. როგორც გამოცემა ამბობს, ამ კომპლექსის გადაცემასთან დაკავშირებით მიმდინარეობს მოლაპარაკებები, თუმცა საკითხავია, მათი რაოდენობის გათვალისწინებით, შეძლებს თუ არა სლოვაკეთი უკრაინისთვის გადასაცემი ერთეულების გამოყოფას.
“არავის სურს მოლოდინებთან ცუდად მოპყრობა”. – თქვა ევროპელმა ანონიმურმა წყარომ ამ საკითხზე.
პარალელურად, გამოცემის თქმით, კონგრესმენები ბაიდენის ადმინისტრაციას მოუწოდებენ, რომ იშუამდგომლონ უკრაინისთვის С-300-ების სისტემის გადაცემაში.
წყარო: „ტაბულა“
კომენტარები