დონეცკის რეგიონიდან საევაკუაციო მარშრუტზე ბრძოლა გრძელდება, რის გამოც უკრაინის ხელისუფლებას ევაკუაციის პროცესის გადადება მოუწია. ინფორმაციას UNIAN ავრცელებს.
ზაპოროჟიეს ოლქში ბრძოლები გრძელდება, რის გამოც დონეცკის ოლქიდან მოსახლეობის ევაკუაციის პროცესი გადაიდო. ამის შესახებ დონეცკის სამხედრო-სამოქალაქო ადმინისტრაციის თავმჯდომარემ, პაველ კირილენკომ Telegram-ზე განაცხადა.
„დილის 10:55 საათისთვის „დუმილის“ დადასტურება მიიღეს მხოლოდ დონეცკის ოლქის ტერიტორიაზე. მარშრუტის შემდგომ მონაკვეთზე, ზაპოროჟიეს რაიონში, ბრძოლა მიმდინარეობს“, – განაცხადა კირილენკომ.
მან, ასევე, განაცხადა, რომ ხელისუფლება მოლაპარაკებებს აწარმოებს რუსულ მხარესთან, რათა დაადასტუროს დუმილის რეჟიმი მარიუპოლიდან მშვიდობიანი მოსახლეობის ევაკუაციის მთელ მარშრუტზე.
მარიუპოლის საქალაქო საბჭომ გაავრცელა განცხადება, რომ რუსული ჯარები მარიუპოლისა და მისი შემოგარენის დაბომბვასაც აგრძელებენ.
„ჩვენ ვთხოვთ მარიუპოლის ყველა მცხოვრებს წავიდნენ თავშესაფრებში. ევაკუაციის შესახებ დამატებითი ინფორმაცია უახლოეს მომავალში გახდება ცნობილი. ამ დროისთვის მიმდინარეობს მოლაპარაკებები რუსეთის ფედერაციასთან „დუმილის რეჟიმის“ დამყარებისა და ჰუმანიტარული დერეფნისთვის უსაფრთხოების უზრუნველსაყოფად“, – ნათქვამია განცხადებაში.
ნებისმიერი ცვლილების შესახებ მოქალაქეებს ეცნობებათ.
შეგახსენებთ, რომ გადაწყვეტილება მოსახლეობის ევაკუაციასთან დაკავშირებით რუსეთ-უკრაინის მოლაპარაკებების მეორე რაუნდზე იქნა მიღებული. რუსეთ-უკრაინის დელეგაციები ამ თემაზე 3 მარტს შეთანხმდნენ.
კომენტარები