საქართველოს პარლამენტში ინიცირებულია კანონპროექტი, რომლის თანახმად, შესაძლოა, გადასახადისგან გათავისუფლდეს 700 ლარამდე ღირებულების, 30 კილოგრამამდე საერთო წონის საქონლის საფოსტო გზავნილი, ნაცვლად 300 ლარის ღირებულებისა.
შესაბამისი ცვლილება საგადასახადო კოდექსში უნდა შევიდეს. კანონპროექტის ავტორები და ინიციატორები საქართველოს პარლამენტის ოპოზოციონერი წევრები ლევან იოსელიანი და ალექსანდრე ელისაშვილი არიან.
ინიციატორი აცხადებენ, რომ ცვლილება დადებითად აისახება მცირე მეწარმეებზე, რომლებიც ონლაინ-ვაჭრობენ, თუმცა მცირე მასშტაბებით.
„წარმოდგენილი კანონპროექტი გავლენას მოახდენს არა მხოლოდ იმპორტის გადასახადის, არამედ დღგ-ს კუთხითაც, რომლის 81% მიიმართება სახელმწიფო ბიუჯეტში, ხოლო 19% – მუნიციპალიტეტის ბიუჯეტში, შესაბამისად, კანონპროექტის გავლენა აისახება მუნიციპალიტეტების ბიუჯეტზეც შემცირების კუთხით.
კერძოდ, საქართველოს ფინანსთა სამინისტროს შემოსავლების სამსახურიდან მიღებული ინფორმაციის თანახმად, საფოსტო გზავნილების შემთხვევაში 300-ლარიდან 700 ლარამდე ღირებულების, 30 კგ-მდე საერთო წონის საქონლის (სეს ესნ 3824 90 980 01 კოდით გათვალისწინებული საქონლის გარდა) დაბეგვრიდან სახელმწიფო ბიუჯეტში იმპორტისა და დამატებული ღირებულების გადასახადების სახით შემოსული თანხის ოდენობა 2019-2021 წელს 17 მლნ-მდე ლარს შეადგენდა.
შესაბამისად, კანონპროექტით გათვალისწინებული ცვლილების მიღების შემთხვევაში, იმ დაშვებით, რომ დაახლოებით იგივე რაოდენობის 300-ლარიდან 700 ლარამდე ღირებულების, 30 კგ-მდე საერთო წონის საქონელი დაიბეგრება, ბიუჯეტის საშემოსავლო ნაწილი, ჯამურად, სახელმწიფო და მუნიციპალიტეტების ბიუჯეტის შემოსავლების კუთხით, შემცირდება წლიურად საშუალოდ 6 მლნ ლარით, თუმცა შემცირების ზუსტი ოდენობა დამოკიდებული იქნება ონლაინვაჭრობის ან სხვა ტიპის კომერციული საქმიანობის ოდენობაზე“, – წერია განმარტებით ბარათში.
კომენტარები