ჭადრაკის ყოფილი ჩემპიონი, გარი კასპაროვი:”მაშინ ისე მიყურებდნენ, თითქოს იდიოტი ვყოფილიყავი. თუმცა, დღეს მე ვგავარ ნოსტრადამუსს, რადგან აღვწერე ის, რისი მოსმენაც ხალხს არ სურდა”

ჭადრაკის ყოფილმა ჩემპიონმა გარი კასპაროვმა, უკრაინის წინააღმდეგ რუსეთის ომის ფონზე, მკვეთრად გააკრიტიკა რუსეთის პრეზიდენტი ვლადიმერ პუტინი გერმანულ გაზეთ Frankfurter Allgemeine Zeitung-თან ინტერვიუში, რომელიც გამოცემის ვებგვერდზე ხუთშაბათს, 3 მარტს გამოქვეყნდა.

“ის, რომ მე მართალი აღმოვჩნდი (ვლადიმერ პუტინთან დაკავშირებით) სიხარულის მიზეზი არ არის. ჩემი ქვეყნისთვის ეს ტრაგედიაა. ათასობით რუსი იღუპება ამ გიჟური დიქტატორისთვის. ბევრი მათგანი დაიბადა პუტინის დროს და პუტინის დროსვე მოკვდება”, – განაცხადა ოპოზიციონერმა.

კასპაროვი პუტინს “ეგზისტენციალურ საფრთხედ” მიიჩნევს.

კასპაროვს როდესაც ერთხელ ჰკითხეს, ვინ უფრო საშიში იყო – პუტინი თუ ISIS – მან უპასუხა: “ტერორისტული ორგანიზაცია მოდის და მიდის, პუტინი კი მუდმივი ეგზისტენციალური საფრთხეა”. “მაშინ ისე მიყურებდნენ, თითქოს იდიოტი ვყოფილიყავი. თუმცა, დღეს მე ვგავარ ნოსტრადამუსს, რადგან აღვწერე ის, რისი მოსმენაც ხალხს არ სურდა”, – განაცხადა მან.

კასპაროვმა ასევე ხაზგასმით აღნიშნა, რომ იმედოვნებს, რომ “ეს ომი გამოიწვევს პუტინის რეჟიმის დაშლას”.

იმისთვის, რომ დიქტატურა დაიშალოს, სამი ფაქტორია საჭირო. პირველი არის სამხედრო დამარცხება. ეს შეიძლება მოხდეს, თუ უკრაინა საკმარის წინააღმდეგობას გაუწევს. მეორე ფაქტორი არის ეკონომიკური და ფინანსური კოლაფსი. მესამე ფაქტორი არის იზოლაცია. ეს ფსიქოლოგიურად ძალიან მნიშვნელოვანია. სამივე კომპონენტის დაკმაყოფილების შემთხვევაში, რეჟიმი შეიძლება ერთ ღამეში დაინგრეს, რადგან ხალხი ქუჩაში გამოვა და ოლიგარქები პუტინს გამოაგდებენ”, – განაცხადა ოპოზიციონერმა.

კასპაროვის თქმით, “დღევანდელ რუსეთში არსებული ვითარება ფანატიზმის თვალსაზრისით ვერ შეედრება სტალინის ან ჰიტლერის გერმანიაში არსებულ მდგომარეობას, სადაც ხალხი მზად იყო მოეკლათ საყვარელი ლიდერისთვის. პუტინის რეჟიმი მხოლოდ ფულზეა დაფუძნებული, ის უფრო მაფიოზურ სახელმწიფოს ჰგავს. სანამ ბოსი ანაწილებს ფულს და დაცვას, ხალხი მის უკან დგას. როგორც კი ფული ჩერდება, მაშინვე ქრება ლოიალობა”, – ხაზგასმით აღნიშნა კასპაროვმა.

“ათიათასობით ადამიანი გამოვიდა ქუჩებში, ცემის, დაპატიმრებისა და წლების განმავლობაში ციხეში ჩაკეტვის საფრთხის მიუხედავად. დღეს ისინი აპროტესტებენ ომს, მომავალ კვირას შესაძლოა გააპროტესტონ ცხოვრების დონის დაცემა. როცა ასიათასობით ან მილიონობით ადამიანი გამოდის ქუჩაში, ვინ დაესხმება მათ ტავს?” – სვამს შეკითხვას კასპაროვი.

გარი კასპაროვი დღეს ადამიანის უფლებათა ფორუმისა და დემოკრატიის განახლების ინიციატივის თავმჯდომარეა.

წყარო: აიპრესი