დაგერიცხათ თუ არა კომუნალურ გადასახადებზე გაორმაგებული თანხა – სემეკი შემოწმების შემდეგ შედეგებს აქვეყნებს

დაერიცხათ თუ არა კომუნალურ გადასახადებზე გაორმაგებული თანხა აბონენტებს – სემეკი “თელმიკოსა” და “თელასის” შემოწმების შემდეგ შედეგებს აქვეყნებს. სემეკში ამბობენ, რომ დადგინდა გარკვეული შეუსაბამობები.

“შესწავლილი იქნა მრიცხველებთან დაკავშირებული საკითხები, აღრიცხვის და დარიცხვის სისწორე, კანონიერება და ამ ყველაფრის შესაბამისობა ჩვენ მიერ დადგენილ წესებთან. გამოვლინდა აღრიცხვასთან დაკავშირებულ ზოგიერთ ნაწილში უზუსტობები, დადგენილი წესების დარღვევა, შესაბამისად მოვისმენთ დეტალურ ანგარიშს შემოწმების ჯგუფის. მოქმედი კანონმდებლობა ითვალისწინებს სანქციის ერთ-ერთ ფორმას დაჯარიმებას, შესაბამისად შესაძლოა იქნას გამოყენებული,” – აცხადებს საქართველოს ენერგეტიკის და წყალმომარაგების მარეგულირებელი ეროვნული კომისიის თავმჯდომარე დავით ნარმანია.

ბოლო რამდენიმე თვეა სოციალურ ქსელში მოქალაქეები წერენ, რომ ელექტროენერგიის გაზრდილ გადასახადს იღებენ. თელმიკოს განცხადებით,  ეს დეპოზიტის დარიცხვის გამო მოხდა, თუმცა ახლა მოსახლეობისთვის დეპოზიტის დარიცხვა შეჩერდა.

თელმიკოს კლიენტთა მომსახურების სამსახურის ხელმძღვანელის, თეა ნოზაძის თქმით, ტარიფი არ გაზრდილა და მან განმარტა, “რატომ უჩნდება მოსახლეობას დენის ტარიფის ზრდის განცდა”.”არის ერთი შემთხვევა, როდესაც ჰგონიათ, რომ ტარიფი გაიზარდა, რეალურად გვიკავშირდებიან და ვუხსნით, რომ [დეკემბერში] თანხა არ გაქვთ გადახდილი და ამან გამოიწვია, თორემ თვიური მოხმარება არ გაზრდილა. და არის კიდევ მეორე მომენტიც, როდესაც მომხმარებლების რაღაც რაოდენობას აქვს [ტარიფის ზრდის] შეგრძნება. ჩვენ შემოვედით ბაზარზე 2021 წლის 1 ივლისიდან, აქედან მოყოლებული ტარიფის ზრდის ცვლილება არ მომხდარა, მაგრამ 1 წლის განმავლობაში მთავრობა ტარიფთა შორის სხვაობის სუბსიდირებას ახდენდა, რომელიც იანვრიდან აღარაა და ესეც ქმნის [ტარიფის ზრდის] შთაბეჭდილებას”, – თქვა მან.