უკრაინაში მყოფი საქართველოს მოქალაქე, ალექსანდრე ქავთარაძე სოციალურ ქსელში ფოტოს და წერილს ავრცელებს:
„ახლა ვუყურებ კადრებს ხარკოვის ცენტრიდან – მუხლებზე დაჩოქილ, მლოცველ ბებოებს და სხვა მოქალაქეებს. ომი ჯოჯოხეთია და როგორც წესი, ის მხოლოდ მათ უხარიათ, ვისაც არ გამოუცდია. უკრაინაში (რომელიც ბოლომდე თავს არიდებდა ყველანაირ პროვოკაციას) დაწყებული ომი არის კიდევ ერთი დასტური იმისა, რომ პუტინი მოქმედებს ისე, როგორც ნაცისტური გერმანიის ლიდერი მოქმედებდა ევროპის კონტინეტზე 1930-იანების ბოლოს. ისტორია იტყვის თავის სათქმელს და ის იქნება რუსეთის ფედერაციის მმართველი კრიმინალური დაჯგუფების მთავარი მსაჯული. ვუთანაგრძნობ უკრაინელ ხალხს, მაგრამ აქვე ვუთანაგრძნობ იმ რუსებს, რომლებისთვისაც მიუღებელია მათი ხელისუფლების პოლიტიკა და ის სისტემა, რაც მათ ჩამოაყალიბეს.
რაც შეეხება საქართველოს: ვფიქრობ, რომ ყველა ბრძოლისუნარიანი მოქალაქე უნდა იყოს მუდმივ მზადყოფნაში: ახლაც და მომავალშიც. საქართველოს ტერიტორიაზე გრძელვადიანი სამხედრო დაპირისპირების შემთხვევაში, ოფიციალურმა პირებმა კაპიტულაციაც რომ გამოაცხადონ, პარტიზანული ომი გარდაუვალ რეალობად უნდა იქცეს. ამ შემთხვევაში, საქართველოში მყოფი კოლაბორაციანისტები უნდა იქცნენ თავდასხმის პირველ ობიექტებად.
ღმერთმა დაიცვას უკრაინა და უკრაინელი ხალხი. ყველამ ყველაფერი უნდა ვცადოთ, რომ ეს სიგიჟე, ეს არანორმალურობა გავაჩეროთ. ბოროტება ყოველთვის დამარცხდება“ – წერს ალექსანდრე ქავთარაძე.
კომენტარები