პროქტოლოგი ბექა კევლიშვილი – ბუასილის გამომწვევ მიზეზებზე, პრევენციის საშუალებებსა და მკურნალობის თანამედროვე მეთოდებზე

ქირურგი და პროქტოლოგი ბატონი ბექა კევლიშვილი მრავალი წელია აქტიურ პრაქტიკულ საქმიანობას ეწევა და მის შესახებ მხოლოდ დადებით   შეფასებებს თუ შეხვდებით, პაციენტები გამოარჩევენ როგორც პროფესიული, ისე პიროვნული თვისებებით. შევეცადეთ დასაწყისში ის ცოტა უფრო ახლოს გაგვეცნო მკითხველისთვის,   საუბარი კი ერთ-ერთი ძალიან გავრცელებული პრობლემის ბუასილის შესახებ, მის გამომწვევ მიზეზებზე, პრევენციის საშუალებებსა და მკურნალობის მეთოდებზე გავაგრძელეთ.

ბექა კევლიშვილი: სამედიცინო სფეროსთან ოჯახური კავშირი არ მქონდა, ოჯახის  თხოვნით ჩავაბარე სამედიცინო უნივერსიტეტში, პირველი კურსის დახურვის შემდეგ ჯარში წავედი, როდესაც დავბრუნდი, დავამთავრე უნივერსიტეტი და მას შემდეგ ვმუშაობ პროქტოლოგად, ამ წლების მანძილზე ვმუშაობდი სხვადასხვა კლინიკებში და ამჟამად ჩემი ძირითადი სამუშაო ადგილი კლინიკა ინიციოა. ვფიქრობ, ძალიან გამიმართლა, რომ ბატონ გელა მუხაშავრიასთან მოვხვდი, არაჩვეულებრივი პედაგოგი გახლდათ და მნიშვნელოვანი როლი შეასრულა ჩემს პროფესიონალად ჩამოყალიბების პროცესში.

_ ყველაზე ხშირად რა დაავადებებით მოდიან პაციენტები თქვენამდე?

_ ყველაზე ხშირად ჰემოროიდული დაავადებებით მოდიან, ეს პროქტოლოგიურ პათოლოგიებში ყველაზე მეტადაა გავრცელებული.

_ როგორც ვიცით, ბუასილი უფრო მეტად მამაკაცებს აწუხებთ, რა არის ამ დაავადების გამომწვევი მიზეზი?

_ წლების წინ ეს დაავადება მართლაც მამაკაცებში უფრო ხშირად გვხვდებოდა, მაგრამ მას მერე რაც ცხოვრების წესი გათანაბრდა, ქალების და მამაკაცების მომართვიანობა თითქმის ერთნაირია. ეს დაავადება ძირითადად შუახნის ადამიანებში ვითარდება, შესაძლოა ძალიან ახალგაზრდა ასაკშიც განვითარდეს, მაგრამ ქირურგიული ჩარევა დაახლოებით  50 წელს გადაცილებულებულ პაციენტებში ხდება საჭირო. ბუასილის გამომწვევი მიზეზები შეიძლება იყოს დიდხანს ჯდომა, არასწორი კვება, ჭარბი ალკოჰოლის მიღება, ფაღარათი, ქალებში ორსულობის დროს ვითარდება ხოლმე.

_ მკურნალობის რა მეთოდები არსებობს?

_ ყოველთვის ვცდილობთ ოპერაციის გარეშე კონსერვატიული მკურნალობით, ან მცირე ინვაზიური საშუალებების გამოყენებით მივაღწიოთ სასურველ შედეგს, თუმცა, არის შემთხვევები, როდესაც თავიდანვე ნათელია, რომ მხოლოდ ოპერაციაა გამოსავალი.

_ დაგვიანებული შემთხვევა შესაძლოა ონკოლოგიური დაავადების განვითარების მიზეზი გახდეს?

_ არა, ბუასილი არასდროს გადადის ონკოლოგიურ დაავადებაში. უბრალოდ რაც უფრო ღრმა პროცესია, კიდევ უფრო მეტად შემაწუხებელი ხდება ეს პაციენტისთვის. მნიშვნელოვანია რომ ჰემოროიდული დაავადების დროს ნებისმიერი ჩივილი არ დაბრალდეს ჰემოროიდულ დაავადებას და არ გამოგვეპაროს რაიმე მნიშვნელოვანი პრობლემა. მნიშვნელოვანია სკრინინგული კვლევები, რაც 40 წლის ასაკიდანაა რეკომენდირებული.

_ ბუასილის ოპერაცია ერთ-ერთ ყველაზე რთულ ოპერაციად ითვლება.

_ დიახ, ტექნიკურად საკმაოდ რთულად შესასრულებელი ოპერაციაა, გარდა ამისა, ბევრი პოსტოპერაციული გართულებები ახლდა თან, მაგრამ დღეს თანამედროვე ტექნიკური საშუალებებით და საკერავი მასალით კეთდება და ბევრად გამარტივებულია პოსტოპერაციული პერიოდი, თუ ადრე მინიმუმ 2 კვირა და საჭიროების შემთხვევაში ერთი თვეც კი ვაჩერებდით პაციენტებს კლინიკაში, ახლა 4-5 დღის მერე ვუშვებთ სახლში.

_რამდენად რეალურია იმის ალბათობა, რომ ოპერაციის შემდეგ ხელახლა განვითარდეს ბუასილი?

_ თეორიულად ლიტერატურაში მოცემულია, რომ დაახლოებით 2 პროცენტი არსებობს ამის ალბათობა, თუმცა პრაქტიკაში ასეთი შემთხვევა არ მქონია და ჰემოროიდული დაავადების გამო ერთი და იგივე პაციენტისთვის ოპერაცია ორჯერ არასდროს  გამიკეთებია.

_პრევენციისთვის რას ურჩევთ მათ, ვინც საოფისე საქმიანობიდან გამომდინარე მთელი დღე უწევთ სკამზე ჯდომა?

_ ჯდომითი სამსახურის შემთხვევაში თუ მოახერხებთ და საათში ერთხელ თუნდაც ერთი წუთის განმავლობაში გაივლით და გაავარჯიშებთ ფეხის კუნთებს, ჩათვალეთ რომ ჯდომით გამოწვეულ მთელ უარყოფით მოვლენებს გაანეიტრალებთ. რაც შეეხება კვებას, სასურველია რომ რაციონში პირველ ადგილზე იყოს უჯრედისით მდიდარი საკვები-ხილი და ბოსტნეული, იმ ქვეყნებში სადაც ძირითადად უჯრედისით მდიდარ საკვებს მიირთმევენ, ბევრად ნაკლებია მსხვილი ნაწლავის სიმსივნეები.

_ პროქტოლოგთან ვიზიტი გარკვეულ კომპლექსებთანაა დაკავშირებული, ალბათ, ამ შემთხვევაში მნიშვნელოვანია ექიმი რამდენად მეგობრულად შეხვდება პაციენტს?

_ გეთანხმებით, მაგრამ ადრე უფრო მეტად უჭირდათ პროქტოლოგთან ვიზიტის დაგეგმვა, სხვადასხვა ქვეყნებში ბოლო წლებში აქტიური კამპანიები მიმდინარეობს იმისთვის, რომ ეს წარმოდგენა შეიცვალოს პაციენტებში, ვინაიდან მნიშვნელოვანია ადრეული დიაგნოსტიკა რაც შემდგომში ოპერაციის თავიდან არიდებას და მკურნალობის ბევრად უფრო გამარტივებას განაპირობებს. რასაკვირველია, მნიშვნელოვანია როგორ შეხვდება ექიმი პაციენტს და როგორ მიაწვდის მის მდგომარეობას, აუცილებელია გულისყურით მოუსმინოთ თითოეულ პაციენტს, შეხვიდეთ მის მდგომარეობაში და დეტალურად აუხსნათ არსებული პრობლემის და მისი მოგვარების გზების შესახებ.

ნინო მახარაძე