პარლამენტის შენობის წინ, საბჭოთა რუსეთის ოკუპაციის 101 წლისთავთან და უკრაინაში მიმდინარე მოვლენებთან დაკავშირებით, “საბჭოთა წარსულის კვლევის ლაბორატორიისა” და “ანტიკორუფციული მოძრაობის” ორგანიზებით გამოფენა-პერფორმანსი გაიმართა.
საქართველოს საკანონმდებლო ორგანoს წინ წარმოდგენილი იყო ფოტო-მასალა, რომელიც შინაარსობრივად ასახავს იმ ზიანს, რაც რუსეთმა ისტორიულად საქართველოს მოუტანა. ფოტოებზე გაკეთებულია მინაწერები: “მსხვერპლი”, “პოლიტიკური ტერორი”, “სტალინის პირადი ვენდეტა”, “პროპაგანდა მეხსიერების წინააღმდეგ” და ა.შ.
ისტორიკოსის, „საბჭოთა წარსულის კვლევის ლაბორატორიის“ წარმომადგენლის, ირაკლი ხვადაგიანის თქმით, „ანტიკორუფციულ მოძრაობასა“ და სამოქალაქო აქტივისტებთან ერთად გადაწყვიტეს გამოფენითა და აქციით გაეხსენებინათ ის მოვლენა, რომელიც საბჭოთა კავშირს უკავშირდება და ეს იმ ფონზე, როდესაც ფრონტის ხაზი დღეს უკვე უკრაინაზე გადის.
“თანამედროვე რუსეთი პირდაპირ და ღიად აანონსებს დაპყრობით ომებსა და ძველი იმპერიული “დიდების” აღდგენას. ამ ფონზე, ცხადია, როგორც 101 წლის წინ, საქართველო დღესაც მსხვერპლთა სიაშია. დიდი ხანია ვხედავთ, რამდენად დომინირებს რუსული რბილი ძალა. უკვე საგანგაშოა სიტუაცია, როდესაც არამხოლოდ რბილი ძალა, არამედ აქტიურ მოქმედებებსაც უნდა ველოდოთ. ამის პარალელურად მეხსიერება არის ძალიან მნიშვნელოვანი, რადგან მოქალაქეთა უმრავლესობას უნდა ესმოდეს, თუ რას ნიშნავს რუსულ სამყაროში ყოფნა. ეს ნიშნავს ეროვნული კულტურისა და ცნობიერების განადგურებას, სახელმწიფოებრიობის მოსპობას და ჩვენს ჩამორჩენას, მინიმუმ, ერთი საუკუნით,” – განაცხადა ხვადაგიანმა.
კომენტარები