„პუტინის სატელევიზიო გამოსვლა, რომელშიც მან დონეცკისა და ლუგანსკის სეპარატისტული რეგიონების აღიარების შესახებ გამოაცხადა იყო აღმაშფოთებელი, ყალბი განცხადებების სერია, რომელიც მიზნად ისახავს ომის საბაბის შექმნას“, – ამის შესახებ გაეროში აშშ-ს მუდმივმა წარმომადგენელმა ლინდა თომას-გრინფილდმა განაცხადა.
თომას-გრინფილდის თქმით, პუტინმა მინსკის შეთანხმებები დაანაწევრა.
რუსეთის პრეზიდენტის განკარგულება რუსული ჯარების შეყვანის შესახებ უკრაინის ტერიტორიაზე და მისი მტკიცე რომ ისინი „სამშვიდობოები“ არიან ეს სისულელეა – „ჩვენ ვიცით, ვინ არიან ისინი სინამდვილეში“.
„რუსეთის ქმედებების შედეგები საშინელი იქნება უკრაინისთვის, ევროპისთვის და მთელი მსოფლიოსთვის“, – აღნიშნავს გაეროში აშშ-ის მუდმივი წარმომადგენელი.
შეერთებული შტატების მუდმივი წარმომადგენლის თქმით, პუტინი აპირებს აჩვენოს, რომ ძალით შეუძლია „გაერო ფარსად აქციოს“.
„ჩვენ ერთად უნდა ვიმოქმედოთ ამ კრიზისის საპასუხოდ”, – აღნიშნა თომას-გრინფილდმა.
მან დასძინა, რომ უკვე 21 თებერვალს, აშშ-ს პრეზიდენტმა ჯო ბაიდენმა დააწესა სანქციები აშშ-ის მოქალაქეების ინვესტიციებსა და სხვა ბიზნესს საქმიანობაზე აღმოსავლეთ უკრაინაში, ხოლო 22 თებერვალს ვაშინგტონი მიიღებს შემდგომ ზომებს, რათა რუსეთს პასუხისმგებლობა დაეკისროს საერთაშორისო სამართლის აშკარა დარღვევისთვის.
ცნობისთვის, რუსეთის პრეზიდენტმა ვლადიმერ პუტინმა, დონეცკი და ლუგანსკი დამოუკიდებელ სახელმწიფოებად აღიარა.
კომენტარები