აშშ: რუსეთი ადგენს უკრაინელების სიას, რომლებსაც შეჭრის შემთხვევაში მოკლავს, ან დაიჭერს

ამერიკამ წერილით მიმართა გაეროს ადამიანის უფლებათა დაცვის უმაღლეს კომისარს, რომ მას აქვს სანდო ინფორმაცია, იმის შესახებ, რომ რუსეთი ადგენს უკრაინელების სიას, რომლებსაც “მოკლავს ან დააპატიმრებს” თუ ის უკრაინაში შეიჭრება.

წერილის ასლს The New York Times ავრცელებს.

წერილში ასევე ნათქვამია, რომ რუსული ძალები ადამიანის უფლებების ფართომასშტაბიან ხელყოფას გეგმავენ, რაც მოიცავს მოქალაქეთა გატაცებასა და წამებას.

წერილის თანახმად, მათი სამიზნე იქნებიან რუსული ქმედებების მოწინააღმდეგე პირები, მათ შორის რუსი და ბელარუსი დისიდენტები, რომლებიც უკრაინაში ცხოვრობენ, ჟურნალისტები, ანტიკორუფციული აქტივისტები, ეთნიკური და რელიგიური უმცირესობები, ასევე LGBTQ თემის წევრები.

“შეერთებულმა შტატებმა ცოტა ხნის წინ მოიპოვა შემაშფოთებელი ინფორმაცია, რომელიც მიუთითებს იმაზე, რომ დაგეგმილია ადამიანის უფლებების დარღვევა და შელახვა შეჭრის შემდეგ. […]

ეს ქმედებები, რომლებსაც წარსულში რუსეთის ოპერაციები მოიცავდა: მიზანმიმართულ მკვლელობებს, გატაცებებს/იძულებით გაუჩინარებას, უსამართლო დაკავებებს და წამების გამოყენებას, სავარაუდოდ მიმართული იქნება მათზე, ვინც ეწინააღმდეგება რუსეთის ქმედებებს, მათ შორის უკრაინაში დევნილობაში მყოფ რუს და ბელარუს დისიდენტებს, ჟურნალისტებს და კორუფციის წინააღმდეგ მებრძოლ აქტივისტებს და დაუცველი მოსახლეობა, როგორიცაა რელიგიური და ეთნიკური უმცირესობები და ლგბტქი+ პირები.

ჩვენ ასევე გვაქვს სანდო ინფორმაცია, რომ რუსულმა ძალებმა, შესაძლოა გამოიყენონ სასიკვდილო ზომები მშვიდობიანი საპროტესტო აქციების დასაშლელად”, – აღნიშნულია წერილში.

როგორც The New York Times წერს, აშშ-ს სამმა ოფიციალურმა პირმა დაადასტურა წერილისა და მისი შინაარსის ავთენტურობა.
მომხდარს უკვე გამოეხმაურა კრემლის სპიკერი, დიმიტრი პესკოვი, რომელმაც ამ ინფორმაციას “აბსოლუტური ტყუილი” უწოდა. მან ჟურნალისტებთან თქვა, რომ სიტუაცია უკრაინაში კვლავ დაძაბულია, თუმცა თქვა, რომ აშშ-ს საელჩოს გაფრთხილება “პოტენციური თავდასხმის” შესახებ “უჩვეულოა”.