რამდენ ხანს ტოვებს „ომიკრონი“ იმუნიტეტს? – თენგიზ ცერცვაძის განმარტება

ინფექციური პათოლოგიის, შიდსის და კლინიკური იმუნოლოგიის ცენტრის გენერალურმა დირექტორმა თენგიზ ცერცვაძემ „პირველი არხის“ ეთერში „ომიკრონის“ შესახებ ისაუბრა.

„ჩვენ რომ არ გაგვეკეთებინა, მერე იტყოდნენ, აი, მთელმა მსოფლიომ გააკეთა და საქართველომ არ გააკეთაო. რა თქმა უნდა, ამ შემსუბუქებას თავისი პლუსებიც აქვს და მინუსებიც. „ომიკრონის“ მასობრივმა გავრცელებამ გამოიწვია ის, რომ ძალიან ბევრი სტრატეგიული მნიშვნელობის დაწესებულება თანამშრომლების გარეშე დარჩა.

მაგალითად, ექიმები, სამხედრო მუშაკები, ფინანსისტები და სხვა. ვფიქრობ, ეს შემსუბუქება გამართლებულია. მსუბუქ და უსიმპტომო შემთხვევებში, ძალიან დიდი ალბათობით, შვიდი დღის მერე ის გადამდები არ არის, მით უმეტეს, არის მკაცრი რეკომენდაცია შვიდი დღის მერე ხუთი დღე პირბადის ტარების.

კონკრეტულად „ომიკრონი“ რამდენ ხანს ტოვებს ადამიანში იმუნიტეტს, ზუსტად არავინ არ იცის. ისევე, როგორც ზუსტად არ იცოდნენ სხვა შტამებზე. თუ რეგულაციებით და შეზღუდვებით ვიხელმძღვანელებთ,  ასე ჩათვალეს კომპეტენტურმა ორგანოებმა, რომ გადატანიდან 60 დღის განმავლობაში იმუნიტეტი საიმედოა, ხოლო შემდგომ შეიძლება, არ იყოს ძლიერი და საიმედო. თუმცა, ვარაუდობენ, რომ იმუნიტეტი მაინც რჩება 6 თვის განმავლობაში, ხოლო ზოგიერთ პაციენტთან, შეიძლება უფრო მეტი დროითაც. მაგრამ, მაღალი დაძაბულობის იმუნიტეტი, რომელიც უფრო სარწმუნოდ იცავს პაციენტს 60 დღე ითვლება“, – განაცხადა ცერცვაძემ.