ფინანსური სანქციები ჟურნალისტებისთვის – ხელისუფლება კრიტიკული მედიის გაჩუმების ახალ ხერხებს მიმართავს. პრემიერ ღარიბაშვილის გარემოცვამ “ტვ პირველის” გამომძიებელი ჟურნალისტების საბანკო ანგარიშებისა და ქონების დაყადაღების მოთხოვნით სასამართლოს მიმართა.
საქმე ეხება ბიზნესმენ ნუგზარ ალუღიშვილის და ირაკლი ღარიბაშვილის მამის სავარაუდო ბიზნეს ინტერესებზე მომზადებულ გამოძიებას.
“სასამართლოში მედიის წინააღმდეგ შეტანილი სარჩელები უკვე ბრძოლის წესად იქცა”- ამბობენ ჟურნალისტები.
“შაბათის ეთერის” ავტორი და წამყვანი ნოდარ მელაძე პრემიერის პირად შურისძიებაზე საუბრობს.
როგორც ჩანს, პრემიერი ღარიბაშვილი ძალიან გაბრაზდა, იმ თემით, რომ სწორედ ჩვენმა გუნდმა გამოიკვლია ღარიბაშვილის მიერ მიტაცებული, გადაფორმებული ტყის ამბავი, ჩვენ მოვიპოვეთ ეს დოკუმენტები. ახლა კი პერსონალური შურისძიება გადაწყვიტა. მისი გარემოცვა და მასთან დაკავშირებული პირები სასამართლოში ჩივიან და ითხოვენ ჩვენი საბანკო ანგარიშების დაყადაღებას. ეს არის ერთადერთი ანგარიში, სადაც გვერიცხება ხელფასი, უნდათ ხელფასი ვერ ავიღოთ. უფრო შორს წავიდნენ და ასევე ითხოვენ, ჩვენი საცხოვრებელი სახლების დაყადაღებას. სასამართლოს რეპუტაცია კი ამ ქვეყანაში საყოველთაოდ ცნობილია და ახლა ამ გზით ცდილობენ, ჩვენი საცხოვრებელი სახლები დააყადაღონ და ამით ჟურნალისტებზე პერსონალური ანგარიშსწორება განახორციელონ! – აცხადებს ნოდარ მელაძე.
ხმაურიანი ჟურნალისტური გამოძიების ავტორი, ჟურნალისტი, მაკა ანდრონიკაშვილი ამბობს, რომ ყველა ის ინფორმაცია, რაც რეპორტაჟში გავიდა, ეყრდნობოდა მთავარი მოქმედი პირების განცხადებებს, რომლებიც წესით დიდი ბიზნესის მფლობელები უნდა ყოფილიყვნენ და როგორც შემდეგში თვითონ საუბრობდნენ აღმოჩნდნენ მუშები:
ვფიქრობთ, რომ ეს სარჩელი სწორედაც რომ პირად შურისძიებას უკავშირდება და სხვა არაფერს”- აღნიშნავს მაკა ანდრონიკაშვილი.
ჟურნალისტ-გამომძიებელი ამბობს, რომ მის რეპორტაჟში, ყველა ფაქტი დოკუმენტებით იყო გამყარებული, ამასთან თავად ნუგზარ ალუღიშვილი არ უარყოფდა, რომ ირაკლი ღარიბაშვილის მამასთან, ტარიელ ღარიბაშვილთან ახლო კავშირები ჰქონდა.
რაც შეეხება იურისტებს, ადვოკატები სარჩელს უპრეცედენტოს უწოდებენ. ქეთევან ზანდუკელი ამბობს, რომ მსგავს შემთხვევებში მოპასუხე მხოლოდ ტელევიზია უნდა იყოს და არა ჟურნალისტები.
ამ შემთხვევაში, იმის გარდა, რომ ჟურნალისტები არიან დასახელებულები, დასახელებულია ნოდარ მელაძე და მოთხოვნილია ყადაღა მის ქონებაზე, რაც ძალიან საფუძვლიან ეჭვს ქმნის, რომ ეს არის იერიში არამხოლოდ ტელევიზიაზე, არამედ მის ძირითად და მნიშვნელოვან აქტორებზე. ითხოვენ 20 000 ლარს მორალური ზიანისთვის, რაც ასევე უპრეცენდენტო თანხაა. ჩვენი საერთო სასამართლოების პრაქტიკით, ასეთი თანხა დადგენილი არ არის არცერთ დავაში.
ნუგზარ ალუღიშვილთან დაკავშირებით, რეპორტაჟი 21 დეკემბერს მომზადდა. ღარიბაშვილებთან დაახლოებული პირი ნინოწმინდაში მიწებისა და ღვინის ქარხანის მფლობელია, ასევე ფლობს ხორბლის საცავებს, თუმცა ადგილობრივები პირდაპირ ამბობენ, რომ ეს ადამიანი არაფორმალურად მართავს პრემიერის მამის ქონებას.
ტვ პირველი
კომენტარები