უკრაინის საზღვარზე ვითარების გამწვავებისა და უკრაინის ტერიტორიაზე რუსული ჯარების სამხედრო შეჭრის რისკის ფონზე, უკრაინის პრემიერმინისტრმა დენის შმიგალმა უკრაინელებს მიმართა. მან ვიდეომიმართვა ფეისბუქით გაავრცელა და უკრაინის მოქალაქეებს სიმშვიდისკენ მოუწოდა,.
შმიგალის თქმით, ქვეყნის არმია მზადაა აგრესორის მოსაგერიებლად.
მან აღნიშნა, რომ 8 წელია უკრაინელი ჯარისკაცები იცავენ საზღვრებს, დიპლომატები რთულ მოლაპარაკებებს აწარმოებენ, უკრაინელებმა კი იციან, რომ მეზობელი არის საშიში და ცდილობს მათ დაშინებას და განადგურებას, თუმცა შმიგალის თქმით, 2014 წლისგან განსხვავებით, უკრაინის ჯარი დღეს მზადაა.
“გუშინ მქონდა კონტაქტი ლიეტუვის პრემიერ-მინისტრთან. რა გავიგეთ ჩვენი შეიარაღებული ძალების სარდლობისგან? რომ დღეს არმია უზრუნველყოფილია ყველა საჭირო ნივთით – საწვავიდან დაწყებული, იარაღით დამთავრებული. რომ შეიარაღებული ძალები მუდმივად აკვირდებიან მოვლენებს. მე კიდევ ერთხელ ხაზს გაუსვამს: ჯარი მზადაა ნებისმიერ მომენტში მოიგერიოს მტერი“, – განაცხადა შმიგალმა.
მან დასძინა, რომ ომი არ არის მხოლოდ ჯარი და იარაღი, მას აქვს მრავალი განზომილება. ჰიბრიდული ომის მაგალითად შმიგალმა ევროპაში გაზის კრიზისი, გრივნის კურსის შესუსტება, კიბერშეტევები, ინფრასტრუქტურის დაზიანება მოიყვანა. ყველაზე სახიფათოდ კი შმიგალმა, დეზინფორმაცია და პანიკა დაასახელა.
ჩვენ ვცხოვრობთ ინფორმაციის სწრაფი გავრცელების სამყაროში, როდესაც პანიკა მტრის საჩუქარია – ამბობს შმიგალი.
მისი თქმით, პანიკა არანაკლებ ანადგურებს სახელმწიფოს, ვიდრე ტანკები და ტყვიამფრქვევები.
“ეს არ არის 2014, არამედ 2022 წელია! ჩვენი არმია ძლიერია, ჩვენი პოზიცია საერთაშორისო ასპარეზზე ძლიერია. ჩვენ დღეს ეკონომიკურად ძლიერები ვართ” ამბობს შმიგალი.
შმიგალმა მოუწოდა უკრაინელებს შეინარჩუნონ სიმშვიდე და არ აყვნენ მტრის პროვოკაციებსა და დეზინფორმაციას.
“ერთადერთი, რაც დღეს ნამდვილად გვჭირდება, არის არ დავემორჩილოთ მტრის ჰიბრიდულ პროვოკაციებს, დეზინფორმაციას. ჩვენი ჯარი მზადაა. ჩვენი არმია ძლიერია! ჩვენი არმია მამაცია! ასეც უნდა ვიყოთ. ჩვენმა ჯარისკაცებმა უნდა იგრძნონ, რომ მათ უკან დგას ასევე ძალა – ძლიერი სული, ბრძენი, ერთიანი უკრაინელი ხალხი! ენდე შენს სახელმწიფოს! ენდე შენს ჯარს! გჯეროდეს უკრაინის! მხოლოდ ერთად ვართ უძლეველი! დიდება უკრაინას!“, – განაცხადა შმიგალმა.
კომენტარები