ნიკა კვარაცხელიას მკვლელობის საქმეზე თბილისის საქალაქო სასამართლოში, მკვლელობის ადგილზე – ანჯაფარიძის ქუჩაზე არსებული ვიდეოკამერის ჩანაწერი გამოიკვლიეს, რომელშიც კვარაცხელიას მკვლელობაა ასახული.
საქმის პროკურორის, გიორგი შაიშმელაშვილის თქმით, დღევანდელ პროცესზე გამოკვლეული მასალებით მტკიცდება წინასწარ განზრახული ჯგუფური დანაშაული და ასევე დგინდება, რომ გარდაცვლილი არც ერთ ბრალდებულს არ იცნობდა.
“მითითებული იყო ის გარემოება თუ, როგორ რა ვითარებაში ჩაიდინა ბრალდებულმა მკვლელობა, როგორ იყვნენ ისინი მომზადებულები, შერჩეული ჰქონდათ ადგილი, როგორ მიუახლოვდა და გადმოვიდა დამუხტული იარაღით. ზუსტად, რომ ქმედების პირთა ჯგუფის მიერ ადასტურებენ. დღევანდელ პროცესზე გამოკვლეული მასალებით დადგინდა, რომ გარდაცვლილი არ იცნობდა არც ერთ ბრალდებულს,” – აცხადებს გიორგი შაიშმელაშვილი.
ცნობისთვის, თბილისში, ანჯაფარიძის ქუჩაზე, 22 წლის ნიკა კვარაცხელიას მკვლელობის საქმეზე აკო ჭელიძე და გიორგი კავილაძე თბილისში, წყნეთში დააკავეს. მათ ბრალი დაუსწრებლად ჰქონდათ წაყენებული. ბრალდებულებს საგამოძიებო უწყება მკვლელობის დღიდან ეძებდა. გამოძიების ინფორმაციით, ნიკა კვარაცხელიას მიმართ 10-ზე მეტი გასროლა განხორციელდა, ბრალდებულებმა კი ტერიტორია თანამზრახველთან ერთად ნაქირავები მანქანით დატოვეს. აკო ჭელიძესა და გიორგი კავილაძეს ბრალი ედება ნიკა კვარაცხელიას ჯგუფურად განზრახ მკვლელობასა და ჯგუფურად ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვა-ტარებაში.
შეგახსენებთ, რომ ნიკა კვარაცხელია ტექნოლოგიების სფეროში საქმიანობდა, ის პლატფორმა Feedc-ის დამფუძნებელია.
კომენტარები