აშშ-ის ადმინისტრაციამ ირანის ბირთვული პროგრამის წინააღმდეგ ადრე დაწესებული სანქციების ნაწილი გააუქმა. ამის შესახებ Reuters იუწყება.
ამასთანავე, აშშ-ის სახელმწიფო დეპარტამენტის ინფორმაციით, ეს ფაქტი არ შეიძლება ჩაითვალოს როგორც ვაშინგტონის მხრიდან თეირანის მიმართ გარკვეული დათმობა.
„სანქციებიდან გარკვეული გამონაკლისის დაშვება იმით არის განპირობებული, რომ მესამე ქვეყნებს ირანის უსაფრთხოების და ბირთვული გაუვრცელებლობის პროგრამებში მონაწილეობის მიღების საშუალება მიეცეს“, – განაცხადეს აშშ-ის სახელმწიფო დეპარტამენტში.
ამასთანავე სახელმწიფო დეპარტამენტის წარმომადგენელმა განაცხადა, რომ ეს ფაქტი არ ნიშნავს, რომ მხარეები ირანის ბირთვულ პროგრამაზე ახალ შეთანხმებასთან ახლოს არიან.
სანქციებიდან გამონაკლისი საშუალებას აძლევს რუსულ, ჩინურ და ევროპულ კომპანიებს ირანის ბირთვულ ობიექტებზე იმუშაონ. საუბარია სამ პროექტზე – არაქსის კვლევით რეაქტორზე, ფორდოს ურანის გამამდიდრებელ ქარხანაზე და ბუშერის ატომურ ელექტროსადგურზე.
აშშ-ის ყოფილმა პრეზიდენტმა დონალდ ტრამპმა 2018 წელს ირანის ბირთვული შეთანხმებიდან აშშ-ის გასვლის და სანქციების აღდგენის გადაწყვეტილება მიიღო. 2020 წელს მან ირანის ბირთვული პროგრამისთვის ყველა გამონაკლისი გააუქმა.
ამჟამად ვენაში ირანის ბირთვულ პროგრამასთან დაკავშირებით მოლაპარაკება მიმდინარეობს. ირანის მოთხოვნაა საერთაშორისო სანქციების გაუქმება.
კომენტარები