გიორგი კეპულაძე : ,,საბანკო სესხის პროცენტი ზოგიერთი პარტიის ლიდერის პოპულისტური განცხადებებით ვერ შემცირდება”

პარტია „მოქალაქეების“ ლიდერი, ალეკო ელისაშვილი დარწმუნებულია, რომ საპენსიო სესხებზე პროცენტი დაიკლებს, თუმცა ეკონომიკური ექსპერტების ნაწილს არ ესმის, ქვეყანაში არსებული რთული ეკონომიკური ვითარების ფონზე, რაზე დაყრდნობით აკეთებს “მოქალაქეების” ლიდერი ასეთ განცხადებას.

რამდენიმე დღის წინ რუსთავი-2-ის ეთერში ალეკო ელისაშვილმა ისიც თქვა, რომ სპეციალური კომისია, რომელიც საპენსიო საკითხებთან დაკავშირებით შეიქმნა მიმდინარე კვირაში შეიკრიბება, თუმცა როგორც bm.ge-ს „საზოგადოება და ბანკების“ გამგეობის თავმჯდომარე, გიორგი კეპულაძემ განუცხადა, კომისიის სხდომა ჯერ ჩანიშნული არ არის.

„ძალიან მნიშვნელოვანია გავითვალისწინოთ ის, რომ პოლიტიკოსებს, დეპუტატებს აქვთ მნიშვნელოვანი ბერკეტი, რომ შეცვალონ ქვეყანაში როგორც პოლიტიკური, ისე ეკონომიკური ვითარება, რაც ჩვენს ყოველდღიურობაზე აისახება, ამიტომ ძალიან დიდი პასუხისმგებლობა მართებთ, როცა ასეთ განცხადებას აკეთებენ. მე მესმის, რომ პოლიტიკოსისთვის ეს ჩვეული მდგომარეობაა, როცა პოპულისტურ დაპირებებს აკეთებს, თუმცა თუ ეს არ ეფუძნება კონკრეტულ ფაქტებს, მალე გამოაშკარავდება. შეიძლება მოკლე ვადაში მოატყუო ადამიანები, თუმცა გრძელვადიან პერსპექტივაში ეს აუცილებლად გამოაშკარავდება. ძალიან მნიშვნელოვანია, რომ პოლიტიკოსებმა ეს გაითვალისწინონ.

დიდი ხანია გვესმის დაპირებები პოლიტიკოსებისგან, მათ შორის ალეკო ელისაშვილისგან საპენსიო სესხებთან დაკავშირებით, მაგრამ ვისურვებდი, რომ მათგან მოვისმინოთ არგუმენტები, თუ როგორ წარმოუდგენიათ საპროცენტო სესხების განაკვეთის შემცირება, როცა ქვეყნის ეკონომიკა ამის საშუალებას არ იძლევა და რეფინანსირების განაკვეთი ბოლო 15 წლის მაქსიმუმზეა. როგორ ესახებათ ეს?“, – განაცხადა კეპულაძემ.

რაც შეეხება კომისიის მუშაობას, კეპულაძის თქმით, სხდომა ჯერჯერობით არ გამართულა და როცა ჩაინიშნება, „საზოგადოება და ბანკები“ ამ პროცესში აუცილებლად ჩაერთვება.

„აუცილებლად დეტალურად შევისწავლით ყველა საკითხს, რაც შეიძლება მოქალაქეებისთვის მნიშვნელოვანი იყოს, მაგრამ მინდა ყველას გვესმოდეს, რომ სესხის საპროცენტო განაკვეთი ხშირად არ არის დამოკიდებული რომელიმე პარტიის ლიდერის განცხადებაზე, ეს დამოკიდებულია ქვეყნის ეკონომიკურ მდგომარეობაზე და საშუალო საპროცენტო განაკვეთებზე ლარში“, – აღნიშნა გიორგი კეპულაძემ.