გაზვიადებულია, თითქოს მიხეილ სააკაშვილი აწამეს და სული ამოხადეს – „მოქალაქეები“ მიხეილ სააკაშვილთან დაკავშირებით საგამოძიებო კომისიის შექმნას მხარს არ დაუჭერს

წამება არ მომხდარა, იყო უღირსი და გულის ამრევი ფაქტი, რომ იძულებით გადაიყვანეს – პარტია „მოქალაქეები“-ს ლიდერი ალეკო ელისაშვილი მიხეილ სააკაშვილთან დაკავშირებით დროებითი საგამოძიებო კომისიის შექმნის საჭიროებას ვერ ხედავს.

„დროებით საგამოძიებო კომისიის შექმნის აზრს ვერ ვხედავთ, რადგან ქვეყანაში უამრავი პრობლემაა და კარგი იქნებოდა, თუ რეალური პრობლემები გადაიჭრებოდა, რაც ხალხს აწუხებს – უმუშევრობა, გაჭირვება. ქვეყნიდან ხალხი გარბის. მთავრობაც აღიარებს, რომ კოვიდის მართვა ხელიდან გაექცა. კომისიები ამ საკითხზე რომ შევქმნათ, გაცილებით უკეთესი იქნებოდა და არა იმაზე, რაც გაზვიადებული და გაბუქებულია, თითქოს მიხეილ სააკაშვილი აწამეს და სული ამოხადეს. წამება არ მომხდარა, იყო უღირსი და გულის ამრევი ფაქტი, რომ იძულებით გადაიყვანეს. აშკარად ძალაც გამოიყენეს და უღირსი საქციელი იყო, რომ კადრები გაავრცელეს, თუმცა ძალით გაბუქებულ თემებზე კომისიის შექმნა და უზარმაზარი ენერგიის ხარჯვა არის ამაო. რა უნდა გამოვიძიოთ, სააკაშვილი აწამეს ციხეში? – უღირსი იყო მისი გადაყვანის მეთოდები“, – განაცხადა ელისაშვილმა.