„გიორგი ფხაკაძე არ იყიდება… მაპატიეთ, მე არავისტი არ ვარ“ – გიორგი ფხაკაძე

„ეს ცოტა სევდიანი პოსტია, მაგრამ გულწრფელი…“ – საზოგადოებრივი ჯანდაცვის ექსპერტი, პროფესორი გიორგი ფხაკაძე სოციალურ ქსელში ემოციურ წერილს აქვეყნებს:„მისწავლია – საკმაოდ, მიშრომია – ბევრი, დამიშვია შეცდომებიც, სხვათა შორის – არც ისე ცოტა, მაგრამ ყოველთვის ვცდილობდი, იგივე შეცდომა არ გამემეორებინა… ასე გროვდება გამოცდილება…მე ადამიანები მიყვარს… ალბათ, თავის დროზე, ბევრ სხვადასხვა საინტერესო პროფესიას შორის ამიტომაც ავირჩიე ექიმობა… კიდევ უფრო მეტად მიყვარს სამშობლო. მე ახლა მისგან შორს ვარ და ეს გრძნობა მით უფრო გამძაფრებულია. რითაც შემიძლია, ვცდილობ, ადამიანებს საქართველოში დავეხმარო…კიდევ – სიმართლე მიყვარს ძალიან… შეულამაზებელი სიმართლე…ზოგს ესმის ჩემი, ზოგს – არა..პოლიტიკური პარტიები ჩემში უფრო მეტ საფრთხეს ხედავენ, ვიდრე სარგებელს… გარკვეული ჯგუფებიც…ადამიანთა გარკვეული კატეგორიებიც… მთავრობას ეშინია, იმიტომ, რომ უკონტროლო ვარ… ერთი რამ უნდა ვთქვა, ძალიან მარტივი პასუხი ყველას, ოპოზიციასაც და პოზიციასაც:: გიორგი ფხაკაძე სახელმწიფოს წინააღმდეგ არასდროს წავა…იმიტომ, რომ მე ვარ ქართველი და მე მიყვარს ჩემი სამშობლო… ჩემთვის მინისტრი პიროვნების სახელი კი არ არის, ჩემთვის მინისტრი არის თანამდებობა, რომელიც ქვეყნის ამა თუ იმ მიმართულების გამართულად ფუნქციონირებაზეა პასუხისმგებელი…. მე ყოველთვის ვეხმარებოდი და თუ მთხოვენ, მომავალშიც დავეხმარები საქართველოს ნებისმიერ ჯანდაცვის მინისტრს… იმიტომ, რომ მე ვთვლი, რომ ვეხმარები არა კონკრეტულ პიროვნებას, არამედ კონკრეტულ თანამდებობას, იმიტომ, რომ ის მართავს საქართველოს ჯანდაცვის სისტემას… ზოგადად, ქართულ საზოგადოებაში სახელმწიფოებრივი ხედვის დეფიციტი გვაქვს, რაც იწვევს ბევრ გაუგებრობასაც და ბევრ პრობლემასაც….სამწუხაროდ, საქართველოში დღეს პრიორიტეტული არაპრიორიტეტულია და არაპრიორიტეტული – პრიორიტეტული. კიდევ ერთხელ ვიტყვი…. ფხაკაძე, გრძელი, რთული, სხვათა შორის, შეცდომებზე ნასწავლი ავტობიოგრაფიის მქონე, ცდილობს, უანგაროდ დაგეხმაროთ… პოლიტიკურ პარტიებს, ბევრს, უარი ვუთხარი, იმიტომ, რომ არ მაინტერესებს არც არავის ფული, არც არავის პოზიცია, არც თანამდებობა, არც სახელი…. ვცდილობ, დაგეხმაროთ, რადგანაც მინდა, საქართველო იყოს უფრო ჯანმრთელი, ძლიერი და წინ წასული… საქართველოში თითქმის ყველაფერი იყიდება, თითქმის ყველაც…. ექსპერტებიც, მათ შორის, ზოგი – ფარმაკომპანიებზე, ზოგი – პოლიტიკურ პარტიებზე და ა.შ.. გიორგი ფხაკაძე არ იყიდება… მაპატიეთ, მე არავისტი არ ვარ… მე ვარ ქართველი და ვარ მხოლოდ ქართული სახელმწიფოს მხარეს…“ – წერს ფხაკაძე.