რუსეთმა ყაზახეთიდან კოლექტიური უსაფრთხოების ხელშეკრულების ორგანიზაციის მისიის ფარგლებში საკუთარი ძალების გაყვანა დაასრულა. ბოლო ოთხი სამხედრო თვითმფრინავი ნურ-სულთანიდან და ალმაათიდან გაფრინდა. გამოცემა Interfax-ის თანახმად, ინფორმაციას რუსეთის თავდაცვის სამინისტრო ავრცელებს.
რუსეთში დაბრუნდა სამშვიდობოების ბოლო ქვედანაყოფები და მეთაურები. რუსეთის ძალებს ყაზახეთში ანდრეი სერდიუკოვი ხელმძღვანელობდა.
“სამშვიდობო ოპერაცია, რომელიც კოლექტიური უსაფრთხოების ხელშეკრულების ორგანიზაციის საბჭოს გადაწყვეტილებით ყაზახეთის რესპუბლიკის ტერიტორიაზე მიმდინარეობდა, დასრულდა.” – თქვა სერდიუკოვმა.
მისი თქმით, სამშვიდობოებმა დასახული მისია შეასრულეს. კოლექტიური უსაფრთხოების ხელშეკრულების ორგანიზაციის ძალებმა ყაზახეთის დატოვება გასულ კვირას დაიწყეს.
ОДКБ რამდენიმე პოსტსაბჭოთა ქვეყნის სამხედრო ალიანსია, რომელსაც რუსეთი ხელმძღვანელობს. მისი ამჟამინდელი წევრები არიან: რუსეთი, სომხეთი, ბელარუსი, ყაზახეთი, ყირგიზეთი და ტაჯიკეთი. ОДКБ-ს წევრი იყო საქართველოც, 1999 წლამდე. ამ ორგანიზაციის ყოფილი წევრები არიან აზერბაიჯანი და უზბეკეთიც.
წყარო – ტაბულა
კომენტარები