“მიშა, არ დალიო არაფერი, არ გაიკარო არავინ, ამ კლინიკაში ყველა შენი მტერია… არ მივცემთ შენი მკვლელობის საშუალებას” – გვარამი

მიხეილ სააკაშვილის ადვოკატმა ნიკა გვარამიამ მესამე პრეზიდენტს გორის სამხედრო ჰოსპიტლის მიმდებარე ტერიტორიიდან მიმართა:

​”მინდა, საჯაროდ მივმართო მიხეილ სააკაშვილს, ვიცი რომ გვიყურებს. მიშა, აქ ვართ ჯერ ერთი, იმიტომ რომ ეჭვი გვეპარება, რომ დილის 10 საათამდე შენ თავს აქ ვინმე დაგვახვედრებს. გეუბნები ღიად და გახსნილად, არ გააკეთებინო არავითარი დამამშვიდებელი, არ დალიო არაფერი, არ დააძინებინო შენი თავი და არ მოატაცებინო.

ჩვენ ვიქნებით აქ, წინაც და იქიდანაც, უჩვენოდ ვერ გავლენ ნებისმიერ შემთხვევაში. არ მიიკარო არც ერთი მათგანი, მოითხოვე შენი ადვოკატების და ექიმების შემოსვლა, ამის გარეშე არაფერზე ხელი არ მოაწერო, ნაბიჯი არ გადადგა პალატიდან ამის გარეშე. აქ ვართ, მხნედ იყავი, არავის მივცემთ შენი აქედან გადაყვანის საშუალებას და არავის მივცემთ შენი მკვლელობის საშუალებას. მე დარწმუნებული ვარ როგორც დამთავრდება ეს ყველაფერი, როგორც შენ თქვი ამ დღეებში – ბოროტსა სძლევს კეთილი.

მიშა, ყურადღებით აქ ვართ, იყავი მხნედ, არ გაიკარო არავინ. ადამიანები, რომლებმაც მოაწერეს ფორმა 100-ს ხელი, ქალბატონი გოგორიშვილი სავარაუდოდ, რომელიც შენი მკურნალი ექიმია და იქ იღიმოდა, არ გაიკარო ის ხალხი, ვინც შენ გაგწირა სასიკვდილოდ და მათ შორის არის ქალბატონი გოგორიშვილიც. ამ კლინიკაში, ჩათვალე, რომ ყველა შენი პირადი მტერია…აქედან ჩვენ დაგიხსნით, იქნება სხვა კლინიკა, თუ სხვა ქვეყანაში გადაყვანა, ამას ჩვენ მივაღწევთ ყველა შემთხვევაში. არავითარი რუსთავი, არავითარი გორი. ორივე მხარეზე ვიდგებით, თუ მაინც გაგიტაცებენ გადავახდევინებთ უძვირეს ფასს და შენ მაინც გადაგარჩენთ, მხნედ იყავი.”