საქართველოს პროკურატურის ორგანიზებით და ამერიკის შეერთებული შტატების საელჩოს მხარდაჭერით, პროკურატურის მენეჯერების 2021 წლის შემაჯამებელი სამუშაო შეხვედრა გაიმართა
ღონისძიებას საქართველოს გენერალური პროკურორი ირაკლი შოთაძე, გენერალური პროკურორის მოადგილეები, მენეჯერები, ამერიკის შეერთებული შტატების იუსტიციის სახელმწიფო დეპარტამენტის რეზიდენტი მრჩეველი სამართლებრივ საკითხებში ლენა ოვენსი და ამერიკის შეერთებული შტატების საელჩოს წარმომადგენლები ესწრებოდნენ.
სხდომა საქართველოს გენერალურმა პროკურორმა ირაკლი შოთაძემ გახსნა და პროკურატურის სისტემაში განხორციელებული ცვლილებების შესახებ ისაუბრა. გენერალურმა პროკურორმა ხაზი გაუსვა მართვის თანამედროვე და ერთიანი მიდგომების მნიშვნელობას, თანამშრომელთა მოტივაციის ამაღლებას და შრომითი ნაყოფიერების გაუმჯობესებას, რაც მისი თქმით, დაკავშირებულია საქართველოს პროკურატურის საქმიანობის ეფექტიანობის ზრდასთან.
შეხვედრის ფარგლებში, სახელმძღვანელო რეკომენდაციები და სისხლის სამართლის პოლიტიკის მიმართულებები განიხილეს. მონაწილეებმა წარდგენილი სახელმძღვანელო დოკუმენტების ირგვლივ მნიშვნელოვანი მოსაზრებები გამოთქვეს, რაც მაქსიმალურად შეუწყობს ხელს აღნიშნული სახელმძღვანელო მითითებების სრულყოფას და საპროკურორო პრაქტიკასთან შესაბამისობას. სახელმძღვანელო მითითების შემუშავების და პრაქტიკაში დანერგვის მიზანია სწორი სისხლის სამართლის პოლიტიკის განსაზღვრა, ერთგვაროვანი საპროკურორო პრაქტიკის დანერგვა, დისკრეციული უფლებამოსილების ფარგლებში პროკურორის მიერ დროული და სწორი გადაწყვეტილებების მიღება, სწრაფი და ეფექტიანი მართლმსაჯულების განხორციელება, რაც საბოლოოდ გაზრდის პროკურორთა საქმიანობის ეფექტიანობას.
ამასთან, სამუშაო სხდომაზე მონაწილეებმა საქართველოს პროკურატურის შინაგანაწესის პროექტის შესახებ იმსჯელეს, წარმოდგენილი დოკუმენტი სამუშაო ვერსიაა და მასში პროკურატურის ორგანიზაციული ხედვა და ახალი მიდგომებია გათვალისწინებული. ასევე, სამუშაო შეხვედრაზე საქართველოს პროკურატურის სექსუალური შევიწროების პრევენციისა და რეაგირების მექანიზმის პრეზენტაცია გაიმართა. მექანიზმი გენდერული აუდიტის რეკომენდაციის საფუძველზე, საქართველოს გენერალური პროკურორის ბრძანებით დამტკიცდა და სექსუალური შევიწროებისპრევენციისთვის განსახორციელებელ ღონისძიებებს და სექსუალური შევიწროების შემთხვევებში დისციპლინური წარმოების საკითხებს განსაზღვრავს.
სექსუალურ შევიწროებაზე რეაგირების მექანიზმის ეფექტიანად აღსრულების მიზნით, საქართველოს გენერალური პროკურორის ბრძანებით, საქართველოს პროკურატურაში მხარდაჭერის ჯგუფი შეიქმნა.
პროკურატურის მენეჯერული რგოლი დიდ გავლენას ახდენს სიახლეების დანერგვასა და ორგანიზაციული მიდგომების გატარებაზე, ასევე, თანამშრომელთა საქმიანობის მართვასა და მოტივაციაზე. შესაბამისად, ამ მიმართულებით სამუშაო შეხვედრები მომავალშიც აქტიურად გაგრძელდება.
კომენტარები