ეკლესიაში პატრიარქმა და ჩვენ ვიცით, რა უნდა გაკეთდეს, რომ ერი გავერთიანდეთ, – ამის შესახებ ბოდბელმა ეპისკოპოსმა, იაკობმა განაცხადა. მან შერიგების აუცილებლობაზე ისაუბრა და აღნიშნა, რომ დღეს შეიძლება ადამიანმა ერთი მხარე აირჩიოს – ეს არის საქართველო. მიტროპოლიტის თქმით, შერიგებას მოახდენს ის ხალხი, რომელიც მხარე არ იქნება და საქართველოს მხარეს იქნება.

„ეკლესიაში პატრიარქმა და ჩვენ ვიცით, რა უნდა გაკეთდეს, რომ ერი გავერთიანდეთ, ასე დაყოფილი აღარ ვიყოთ. ცოტანი ვართ და ყველა მხარეს ყველა ჩვენია. განა არ შეგვიძლია მართლისა და მტყუანის გარჩევა?! დღეს ის დროა, მხარეს ვეღარ იჭერ. დღეს შეიძლება ერთი მხარე ავირჩიოთ – ეს არის საქართველო და ყველა უნდა დავდგეთ საქართველოსთან, რადგან იგი ჩვენი ქვეყანაა, ჩვენი სამშობლო და ჩვენი სახელმწიფოა. სხვა სამშობლო ჩვენ ქართველებსა და აქ მცხოვრებ ხალხს არ გაგვაჩნია, ეს არის და მას ვერვინ ვერ შეგვიცვლის.

ცოტა ხნის წინ, ვისაუბრე შერიგებაზე. ვცდილობ, რომ მხარედ არ გამოვჩნდე. ვიცი, სადაა ჭეშმარიტება და სიმართლე, მაგრამ დგება-ხოლმე დრო, ზოგჯერ, თქმა სჯობს არათქმასა, ზოგჯერ თქმითაც დაშავდებისო. შეიძლება, ასეთ სიტუაციაში ვიყოთ, დღეს მთავარია ერთმანეთთან მისასვლელი გზები ვნახოთ ქართველებმა.

თუ არა ეკლესიაში, შანსი არ არის ჩვენი შერიგების, ეს ყველამ კარგად ვიცოდეთ, რადგან ეკლესიაში შერიგება ნიშნავს იმას, რომ ჩვენ ერთმანეთის ღირსებას გავუფრთხილდებით. დღეს არ ვუფრთხილდებით. ვიღაცებს უნდა, თავზე რაღაც მოახვიოს, ასე არ გამოვა. ჩვენ უნდა ვაღიაროთ: მე ვიქნები, სხვა, საზოგადოების ნაწილი თუ ხელისუფლებები იქნებიან უნდა ვაღაროთ, ის შეცდომები თუ დანაშაულები, რაც ერთმანეთის მიმართ მიგვიძღვის. დაწყებული ალბათ, თავისუფლებასა და დამოუკიდებლობას როგორ მოვეპყარით, დაიწყეს ძმათამკვლელი ომი და დავზარალდით ქვეყანა. შემდეგ აფხაზეთსა და ცხინვალის რეგიონში გადაგვივიდა ეს საკითხები და კარგად ვხედავთ, დღეს როგორ მდგომარეობაში ვართ.

იმედით ვარ აღსავსე, რადგან ამ ბოლო პერიოდში ყველა ლაპარაკობდა შერიგებაზე. ვფიქრობ, ვნახავთ გზას, შევიკრიბოთ ეკლესიაში, ჩვენ ძალიან ბევრისთვის მძიმე სათქმელი გვაქვს, იმათაც თუ რამეა აქვთ სათქმელი, გვითხრან. სჯობია, ეკლესიაში მოხდეს, ერთმანეთის ღირსებას გავუფრთხილდებით და რაც მთავარია, ყველაში უნდა მოხდეს შერიგება. ეკლესიამ ვიცით, ეს როგორ უნდა მოხდეს. სინოდის უდიდესი ნაწილი პატრიარქიდან დაწყებული, თუნდაც, იცით, მე როგორი ვარ-ხოლმე გამონათქვამებში, რამდენი ხანია ჩუმად ვარ, რადგან არ მინდა ისე გავაკეთო, რომელიმე მხარეს აღმოვჩნდე. შერიგებას მოახდენს ის ხალხი, რომელიც მხარე არ იქნება და საქართველოს მხარეს იქნება. დღეს თუ მხარეს დადექი ეპისკოპოსი, ან მთავრობის, ან ვიღაცების მხარეს, ასე არ გამოვა, რადგან ვხედავ, რომ ჩვენ ერს უნდა ერთად ყოფნა. ჩვენ თუ ერთად არ ვიქნებით, რა სისულელეა, დაამარცხე კორონა, შიგნით თუ ასე დავჭამეთ ერთმანეთი.

წელიწადზე მეტია, ქვეყანას უკვე განვითარების საშუალება აღარ ეძლევა. ქუჩაში სირბილი კალიების შემოსევა ხომ არ არის?! სარანჩებივით დავჭამოთ ერთმანეთი. ისინი მოსავალს ჭამენ, ჩვენ ერთმანეთს ვჭამთ, რაღაც ერთმანეთთან მისასვლელი გზები უნდა ვნახოთ. ბევრი დგას საქართველოს მხარეს, ბევრს ჰგონია საქართველოს მხარეს დგას. პირდაპირ გეტყვით, არ დგანან. არ უნდა დავასუსტოთ ჩვენი ქვეყანა. ომია, მესამე მსოფლიო ომია (პანდემიას გულისხმობს) მსხვერპლი გვექნება, მაგრამ უნდა ვეცადოთ, ომში ნაკლები მსხვერპლით გავიმარჯვოთ. სამწუხაროდ, ვერავინ დამარწმუნებს, ასეთ ომები ხელოვნური არ არის. თან ვიცი რასაც ვამბობ, იმას ვლაპარაკობ.

როგორღაც უნდა დავაღწიოთ თავი, როგორღაც ქართველებმა უნდა შევიყვაროთ ერთმანეთი. შერიგების მერე საქართველოში კაცი არ უნდა დაგვრჩეს, ისეთი, ვისაც ქართველი და საქართველო უყვარს, რომ ნაწყენი იყოს, თორემ, შეიძლება, ვიღაცა იყოს შემოპარული და იმას ეწყინოს. რა მრწამსის, ეროვნების არ უნდა ვიყოთ, როგორი აზროვნებაც არ უნდა გვქონდეს, ვინც საქართველოში ვცხოვრობთ, ჩვენი საქართველოა და გავერთიანდეთ“, – განაცხადა მეუფფე იაკობმა.