სახალხო დამცველი ნინო ლომჯარია შეერთებული შტატების ელჩის განცხადებას ეხმაურება და მას საარჩევნო რეფორმის საკითხების მტკიცე მხარდაჭერისთვის მადლობას უხდის.
როგორც ომბუდსმენი Facebook-ზე წერს, საარჩევნო ბარიერის დაწევა საქართველოს დემოკრატიული მომავლისთვის უმნიშვნელოვანესი საკითხია.
“დიდი მადლობა აშშ-ს ელჩს, ქ-ნ კელი დეგნანს საარჩევნო რეფორმის საკითხების მტკიცე მხარდაჭერისთვის! საარჩევნო ბარიერის დაწევა არ არის რომელიმე პოლიტიკური პარტიის, ან პოლიტიკური შეთანხმების მედიატორი ქვეყნების მხრიდან თავს მოხვეული საკითხი, დაბალი საარჩევნო ბარიერი დღეს არის უმნიშვნელოვანესი და საკვანძო საკითხი საქართველოს დემოკრატიული მომავლისთვის, რასაც მხარს ვუჭერთ ყველა, ვისაც საარჩევნო რეფორმებზე და ადამიანის უფლებების საკითხებზე გვიმუშავია ამ ქვეყანაში! იმედია, ათწლეულების ბრძოლა პროპორციული წარმომადგენლობის მისაღწევად წარმატებით დასრულდება!”, – წერს ნინო ლომჯარია.
ცნობისთვის, აშშ-ის ელჩმა თქვა, რომ საქართველოს განვითარების ამ ეტაპისთვის 2%-იანი ბარიერი და სრულად პროპორციული საარჩევნო სისტემა მნიშვნელოვანია.
“ეს არის ის, რაც მნიშვნელოვანია საქართველოს განვითარების ამ ეტაპისთვის, რამაც უნდა შეიყვანოს პარლამენტში უფრო მეტი პარტია, მეტი მრავალფეროვნება და რაც მთავარია, მეტი ხმა და პოზიცია იყოს წარმოდგენილი საქართველოს პარლამენტში. შესაბამისად, მიგვაჩნია, რომ საქართველოს დემოკრატიული განვითარების ამ ეტაპზე ეს იქნება საუკეთესო გზა”, – თქვა აშშ-ის ელჩმა.
კომენტარები