როდესაც თქვენ მეკითხებით, რა არის მომავალი წლისთვის ყველაზე დიდი გამოწვევა სამინისტროსთვის, არის სწორედ ეს სახურავი- კულტურის მინისტრის, თეა წულუკიანის თქმით, გელათის რეაბილიტაციის პროცესი თავის დროზე არასწორად წარიმართა, რის გამოც, დიდი ალბათობით ტაძარზე მოწყობილი კრამიტის სახურავი მოსახსნელი იქნება.
“იტალიელ ექსპერტთა ჯგუფი ამ წუთშიც მუშაობს და რა თქმა უნდა, ჩვენ მათზე ვართ დამოკიდებული, რომ დადონ რეალური გამოსავალი, რომელიც არის კომპლექსური და გრძელვადიანი სტრატეგია და ამის შედეგად შემუშავდეს პრობლემის აღმოფხვრის პროექტი. ვშიშობ, თუმცა ამას დარწმუნებით ვერ განვაცხადებ, სანამ არ იქნება ეს დასკვნითი პროექტი, რომ ის კრამიტის სახურავი, რომელიც ძირითადად ტაძარზე არის მოწყობილი ე.წ. დუღაბითურთ იქნება თავის დროზე მოსახსნელი.
ეს ძალიან დიდი სამუშაოა და როდესაც თქვენ მეკითხებით, რა არის მომავალი წლისთვის ყველაზე დიდი გამოწვევა სამინისტროსთვის, არის სწორედ ეს სახურავი, რომელიც თუ მოსახსნელი იქნება და 90%-ით ეს ასე იქნება, ეს არის უმძიმესი, როგორც მორალურად ასევე, ფსიქოლოგიურად და ამას კიდევ აიტანდა კაცი, ტექნიკურად. აქ დგება ის ერთი პრობლემა, რომელიც არის დილემა და რასაც იტალიელი ექსპერტები მუდმივად სვამენ და მათაც არ აქვთ პასუხი, შეგვიძლია თუ არა ჩვენ დავიწყოთ სახურავის მოხსნა, თუ ეს გახდა საჭირო ისე, რომ უკვე დაზიანებული კედლის მხატვრობამ ეს აიტანოს, იმიტომ, რომ ვიბრაციამ შეიძლება ეს დააზიანოს”, — განაცხადა წულუკიანმა.
კომენტარები