კასპში 34 წლის ნოდარ ღუნაშვილის მკვლელობაში ბრალდებულს, ზურაბ კახიშვილის სამუდამო პატიმრობა მიუსაჯეს. დანაშაულის დაფარვისთვის დაკავებულ ცოლს, ქეთი ჩხაიძეს კი 5 წლით და 6 თვით თავისუფლების აღკვეთა.
ნოდარ ღუნაშვილის დედა, მოსამართლის მიერ გამოტანილი ვერდიქტის შესახებ პირველად “ტვ პირველთან” საუბრობს.
ხათუნა რაზმაძე მკვლელობაში ბრალდებულ ზურაბ კახიშვილისთვის სამუდამო პატიმრობის მისჯით კმაყოფილია, თუმცა, იქვე ამბობს, რომ მისი რძალი, სასტიკი დანაშაულის დაფარვის ბრალდებით გასამართლებულ ქეთევან ჩხაიძე, დანაშაულის თანამონაწილეა და უფრო დიდ სასჯელს იმსახურებს.
„უვადო პატიმრობას ველოდებოდი, მადლობა მინდა, ვუთხრა მოსამართლეს. იმედი მქონდა, რომ ქეთის ბრალი დაუმძიმდებოდა, მაგრამ მოსამართლის მხრიდან ამაზე მეტი ალბათ არ შეიძლებოდა. დარწმუნებული ვარ, რომ ეს ყველაფერი მაგის გამო და მისგან გამომდინარე მოხდა”- თქვა ღუნაშვილის დედამ.
ნოდარ ღუნაშვილის ცხედარი კასპის სასაფლაოზე მწყემსმა 14 მარტს იპოვა. მას ყელი ჰქონდა გამოჭრილი.
შემზარავი მკვლელობიდან რამდენიმე დღეში პოლიციამ 33 წლის მამაკაცის ბავშვობის მეგობარი, ზურაბ კახიშვილი, დააკავა. დაკავებულია ასევე ღუნაშვილის ცოლი, ქეთევან ჩხაიძე. მას გამოძიება დანაშაულის დაფარვაში ედავება.
კომენტარები