„პრეზიდენტმა შარშან თქვა, ბიუჯეტი დარჩა გასახარჯი და კლარნეტი ვიყიდეო, გაასაჯაროონ მაშინ ყველას თანხები“ – რომან გოცირიძე

პარტია „ნაციონალური მოძრაობის“ წევრის რომან გოცირიძის განცხადებით, ექსპრეზიდენტ მიხეილ სააკაშვილს გამოძიებამ აბსურდული ბრალი წაუყენა, რომელიც წარმომადგენლობითი ხარჯების გაწევას ეხება.

მისი თქმით, ექსპრეზიდენტის მიერ დახარჯული ფული, ქვეყნის შიგნით და გარეთ, მისი მოვალეობის შესრულებას ხმარდებოდა.

„ყველა ხედავს, რომ ეს ბრალდება აბსურდულია, რა 9 მილიონი, წარმომადგენლობითი ხარჯებია. გაასაჯაროონ მაშინ სხვა პრეზიდენტების, ბიძინა ივანიშვილისა და თუნდაც დღევანდელი პრეზიდენტის ხარჯი. შარშან განაცხადა, ბიუჯეტი დარჩა დასახარჯიო და იმით კლარნეტი ვიყიდეო. წარმოგიდგენიათ სააკაშვილს რა აბსურდს ედავებიან. 

გუშინ საქართველომ დაკარგა იმდენი ფული, რამდენიც არის ჩვენი თავდაცვის ბიუჯეტის მესამედი, 80 მილიონი დოლარი, ამ ხელისუფლების კორუფციული გარიგებებისა და ეკონომიკური შეცდომების გამო. 

აქ კი სააკაშვილს 9 მილიონს ედავებიან ისეთ ხარჯებს, რომელიც ქვეყნის საგარეო თუ საშინაო მოვალეობის შესრულებისთვის არის განკუთვნილი“, – აღნიშნა რომან გოცირიძემ.