უკრაინაში რუსული ჯარის გააქტიურების აღსაკვეთად ძალიან ცოტა დროა დარჩენილი, ამიტომ მოსკოვის შესაკავებლად მისაღები ზომები უნდა დაჩქარდეს. New York Times-ის ცნობით, ამის შესახებ ამერიკულმა დაზვერვამ ევროპის ქვეყნებში თავისი კოლეგები გააფრთხილა.
გამოცემის ცნობით, დაზვერვის სამსახურებში დარწმუნებულები არიან, რომ თავდასხმისთვის ყველაფერი მზადაა და ის შესაძლოა ძალიან მალე მოხდეს. ამასთანავე, ამერიკელი ოფიციალური პირები ფიქრობენ, რომ მოსკოვს ჯერ არ აქვს გადაწყვეტილი, რა დაავალოს უკრაინის საზღვართან მობილიზებულ ჯარებს.
მიუხედავად ამისა, აშშ-ში მიიჩნევენ, რომ ვაშინგტონმა და ევროპულმა ქვეყნებმა უფრო აქტიურად უნდა ითანამშრომლონ იმ ეკონომიკური და სამხედრო ნაბიჯების კოორდინაციისთვის, რომელთა საშუალებითაც მოსკოვის შეკავება იქნება შესაძლებელი. ამ მიზნით მიმდინარე კვირაში აშშ-ის ეროვნული დაზვერვის სააგენტოს დირექტორი ევრილ ჰეინსი ბრიუსელში იმყოფებოდა.
14 ნოემბერს, უკრაინის პრეზიდენტმა, ვოლოდიმირ ზელენსკიმ განაცხადა, რომ უკრაინის საზღვართან 100 ათასამდე რუსი სამხედროა განლაგებული. 16 ნოემბერს, აშშ-ის თავდაცვის დეპარტამენტის ოფიციალურმა წარმომადგენელმა, ჯონ კირბიმ განაცხადა, რომ უკრაინის საზღვართან რუსეთის უჩვეულო სამხედრო აქტივობა და შეიარაღებული ძალების კონცენტრაცია კვლავ ფიქსირდება. 18 ნოემბერს, აშშ-ის თავდაცვის მდივანმა, ლოიდ ოსტინმა განაცხადა, რომ აშშ უკრაინის საზღვართან სიტუაციას ყურადღებით აკვირდება.
კომენტარები