“სანქციები არის ბერკეტი, რომლის გამოყენებაც “ოცნების” წინააღმდეგ მალე დაიწყება” – აკაკი მინაშვილი ევროპარლამენტარების წერილზე

“ნაციონალური მოძრაობის” წევრი აკაკი მინაშვილი ევროპარლამენტარების წერილს ეხმაურება და ამბობს, რომ მიხეილ სააკაშვილის მიმართ ძალადობის შემდეგ, პარტნიორების მხრიდან სანქციების გამოყენებაზე საუბარი მოსალოდნელი იყო.

როგორც მინაშვილმა აღნიშნა, ქვეყნის შიგნით და გარეთ ყველა შეთანხმებულია, რომ არსებული ხელისუფლების პირობებში საქართველოს წინსვლის საშუალება არ აქვს.

“მოსალოდნელი იყოს მსგავსი ნაბიჯები ჩვენი დასავლელი პარტნიორების მხრიდან, რადგან უფრო და უფრო მძიმდებოდა ვითარება ქვეყანაში დემოკრატიის კუთხით, უფრო და უფრო ანტისახელმწიფოებრივად იქცევა “ქართული ოცნება”. ის კადრები, რაც ჩვენ ვნახეთ და ის ძალადობის ფაქტები, რომლებიც განხორციელდა პრეზიდენტ სააკაშვილზე, ბუნებრივია, რომ გამოიწვევდა ძალიან მკაცრ შეფასებას.

ლოგიკური გაგრძელებაა. სანქციების საკითხი არის ის ბერკეტი, რომლის გამოყენებაც დაიწყება ძალიან მალე “ქართული ოცნების” წინააღმდეგ. ყველა შეთანხმებულია, ქვეყნის შიგნით და გარეთ, რომ ამ ხელისუფლების პირობებში საქართველოს არ აქვს წინსვლის და წარმატების საშუალება”, – თქვა აკაკი მინაშვილმა.

ცნობისთვის, 23 ევროპარლამენტარი საქართველოს მესამე პრეზიდენტის, მიხეილ სააკაშვილის მიმართ არაადამიანურ მოპყრობაში მონაწილე პირების სანქცირებას ითხოვს. ამის შესახებ ნათქვამია წერილში, რომლითაც ევროპარლამენტარები ევროპული კომისიის პრეზიდენტს, ურსულა ფონ დერ ლეინს, ევროკავშირის საგარეო პოლიტიკურ ხელმძღვანელს, ჟოზეფ ბორელსა და ევროპული საბჭოს პრეზიდენტს, შარლ მიშელს მიმართავენ.