უკრაინის სახალხო დამცველი, რომელსაც მიხეილ სააკაშვილის მონახულების საშუალება არ მიეცა, აცხადებს, რომ საქართველოს ხელისუფლება რაღაცას მალავს. ლუდმილა დენისოვას თქმით, სააკაშვილი თითქმის სამი დღეა საწოლიდან ვერ დგება და ძალიან განიცდის იმ პროცესებს, რომლებიც მის გარშემო ვითარდება.
„როგორც გავიგე, ამიერიდან მხოლოდ ახლობლებს, ადვოკატებსა და ჩვენს უკრაინელ კონსულს დაუშვებენ. დღეს მასთან ადვოკატი იყო, რომელმაც მიხეილისგან წერილი გადმომცა. ის წერს, რომ დაწესებულება, სადაც ახლა ის იმყოფება არ არის საავადმყოფო. კლინიკაში აპარატურა არის, მაგრამ ის არაა მულტიპროფილური. კრიმინალები მის სახელს მთელი დღე ყვირიან. სააკაშვილი, ასევე, წერს, რომ დღეს უკვე მესამედ არ მიეცა საკუთარ სასამართლო პროცესზე დასწრების უფლება. ის რჩება უკრაინის ერთგულ მოქალაქედ და ძალიან განიცდის იმ პროცესებს, რომელიც ახლა იქ ვითარდება”, — განაცხადა დენისოვამ ჟურნალისტებთან.
სახალხო დამცველს წერს, რომ მიხეილ სააკაშვილი თითქმის სამი დღეა საწოლიდან ვერ დგება. წნევა ძალიან დაბლიდან რეკორდულად მაღალ მაჩვენებელზე ხტება. კალიუმი ერთ მომენტში 2,6-მდე დაეცა.
“ამის შემდეგ მისმა ექიმმა ის წამლებით დაასტაბილურა, მაგრამ რადგან ექიმის შემოშვება შეწყვიტეს, მანამც წამლების მიღება შეაჩერა. სახელმწიფო რაღაცას მალავს”, — აცხადებს დენისოვა.
ლუდმილა დენისოვა აცხადებს, რომ მას უფლებამოსილება უკრაინის პარლამენტის მიერ აქვს მინიჭებული და მანდატი უკრაინის ნებისმიერ მოქალაქეზე ვრცელდება, განურჩევლად მისი ადგილსამყოფელისა.
“იქედან გამომდინარე რომ უფლებამოსილება უკრაინის პარლამენტის მიერ მაქვს მონიჭებული, ჩემი მანდატი უკრაინის ნებისმიერ მოქალაქეზე ვრცელდება, განურჩევლად მისი ადგილსამყოფელისა. გამომდინარე იქედან რომ მიხეილ სააკაშვილის მონახულება ვერ შევძელი, დასკვნები იმ ადამიანების ნათქვამიდან გამომაქვს რომლებსაც მასთან უშვებენ. აქედან გამომდინარე ვაცხადებ რომ ადამიანის უფლებათა დაცვის კონვენციისა და საერთაშორისო ნორმების დარღვევასთან გვაქვს საქმე. ამასთანავე ვაცხადებ რომ შეფასების დროს შემიძლია გამოვიყენო ის საერთაშორისო სამართლის ნორმები რომლებიც როგორც უკრაინას ასევე საქართველოს აქვთ რატიფიცირებული”, – აღნიშნა ლუდმილა დენისოვამ.
კომენტარები