საზღვრის უკანონოდ კვეთის საქმეზე მიხეილ სააკაშვილმა სასამართლო პროცესში დისტანციურად ჩართვაზე უარი განაცხადა. ამ მოთხოვნით პენიტენციურ სამსახურს თბილისის საქალაქო სასამართლოს მოსამართლე დავით კურტანიძემ მიმართა.
მოსამართლის თქმით, სასამართლომ შესაბამისი მოთხოვნა გაგზავნა, თუმცა ბრალდებულისგან უარი მიიღეს.
გამოძიების ინფორმაციით, მიხეილ სააკაშვილმა საქართველოს საზღვრების უკანონოდ გადმოკვეთა სატვირთოს მისაბმელით. საზღვრის უკანონოდ კვეთაში დახმარებისთვის, დანაშაულის დაფარვის მუხლით, ბრალი წარდგენილი აქვთ ელგუჯა ცომაიას, გიორგი ნარიმანიძეს და მამა-შვილ წოწორიებს.
საზოგადოებას შევახსენებთ, რომ მიხეილ სააკაშვილი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. ასევე, მიხეილ სააკაშვილი ბრალდებულია „ტელეიმედი“-ს დარბევის, 7 ნოემბრის დარბევის და პატარკაციშვილების ქონების უკანონოდ დაუფლების და სახელმწიფო დაცვის სპეციალური სამსახურის კუთვნილი – 9 024 367 ლარის მისი პირადი მიზნებისთვის გაფლანგვის ფაქტებზე. აღნიშნულ საქმეებზე მიმდინარეობს განხილვა თბილისის საქალაქო სასამართლოში.
მიხეილ სააკაშვილი უკვე 47-ე დღეა შიმშილობს. პროტესტის ამ უკიდურესი ფორმის გამო, მისი ჯანმრთელობის მდგომარეობა მძიმეა. ექიმები ამბობენ, რომ სასიცოცხლოდ მნიშვნელოვანია, ყოფილი პრეზიდენტი დაუყოვნებლივ იქნას გადაყვანილი სამოქალაქო მრავალპროფილურ კლინიკაში.
კომენტარები