ზურა ჭიაბერაშვილი სოციალურ ქსელში წერს:
“10 პუნქტი, თუ რატომაა დღეს სახლში ჯდომა მკვლელობაში თანამონაწილეობა.
1. რეჟიმს სააკაშვილის გატეხა უნდა. რეჟიმს უნდა, სააკაშვილმა შიმშილობა რეალურ საავადმყოფოში გადაყვანის გარეშე შეწყვიტოს, რომ პროპაგანდა ისევ გადააწყოს მესიჯზე „აი, მშიშარა, აი, სიკვდილის შეეშინდა“. ამ პროპაგანდით ის დაუბრუნდება იმ მესიჯსაც, რომ სააკაშვილს რეალურად არც არასოდეს უშიმშილია და ეს ტყუილი იყო.
2. სინდისის მქონე ყოველი მოქალაქის დღეს სახლში ჯდომა ნიშნავს, გადაწყვეტილების მთელი ტვირთი 44 დღით ნაშიმშილებ, ფსიქოლოგიური ტერორის ქვეშ მყოფ ადამიანს აკიდო. ეს ნიშნავს, რომ სააკაშვილი დააყენო არჩევანის წინაშე – ან მოკვდი, ან დანებდი რეჟიმს.
3. რეჟიმისთვის სააკაშვილის გატეხა ან სიკვდილი საშუალებაა 2020 და 2021 წლების მიტაცებული არჩევნების შედეგად წარმოქმნილი საპროტესტო ტალღის ჩასაქრობად. ეს თუ მოახერხა, ათწლეულები (არ ვაჭარბებ, ათწლეულები) ვიქნებით რუსეთის უკანა ეზო – ღატაკი და დამცირებული, მორალისგან დაცლილი და ცინიზმით სავსე ადამიანი-ზომბებით დასახლებული ტერიტორია.
4. რეჟიმი ნელა, მაგრამ მაინც გამოდის წონასწორობიდან. “საზოგადოებას მობეზრდა მუდმივი დაპირისპირება პოლიტიკურ ძალებს შორის და ჩვენ უზრუნველვყოფთ დღის წესრიგის რადიკალურ ცვლილებას ქვეყანაში,” – ესაა სამთავრობო მესიჯი კობახიძის პირით. ანუ დღევანდელი მდგომარეობა აწუხებთ და გვიწვევენ, რომ შეტევაზე გადმოვიდნენ.
5. მძევალი სააკაშვილის მიმართ ღირსების შემლახავი, არაადამიანური მოპყრობითა და მისი სიცოცხლის რისკთან “რუსული რულეტკით” თამაშით რეჟიმს საპროტესტო მოძრაობის დღევანდელი მონაწილეების წონასწორობიდან გამოყვანა უნდა იქამდე, ვიდრე ქუჩაში მორალშერჩენილი ყველა მოქალაქე გამოვა. წონასწორობიდან გამოყვანა კი იმიტომ უნდა, რომ დარბევები, მასობრივი დაჭერები, ძალადობა და ძალადობრივი რეპრესია გაამართლოს. ასე ფიქრობს იგი საპროტესტო ტალღის ჩახშობას.
6. სააკაშვილის მდგომარეობის გადახარშვა გონებით და გაძლება ემოციურად ურთულესი საქმეა, მაგრამ ამან წინასწორობა არ უნდა დაგვაკარგინოს. თუ წონასწორობა დავკარგეთ, სააკაშვილიც განწირულია და ქვეყანაც. უნდა შევინარჩუნოთ სიბრაზე, მაგრამ ემოცია გონებას უნდა დავუმორჩილოთ.
7. ივანიშვილი ყოველთვის თვლიდა ერთ რამეზე: მისი მოწინააღმდეგეები ვერ იმოქმედებენ შეწყობილად, შეთანხმებულად და დისციპლინით (კლასიკური “პატიმრის დილემა” – კომენტარში ჩავაგდებ ახსნას). ოპოზიციის ერთიანობამ ადგილობრივ არჩევნებზე პირველად გააცუდა ივანიშვილის გათვლა. ახლაც ასე უნდა დავუპირისპირდეთ.
8. ოღონდ ახლა მხოლოდ პარტიული რესურსი ამას ვერ უშველის. განვლილ კვირაში ოპოზიციამ ორგანიზებული პროტესტის კარგი მაგალითები გვიჩვენა, მაგრამ ახლა პროტესტის მასშტაბის გაზრდაა საჭირო. თუ ზედიზედ რამდენიმე დღე მორალშერჩენილი ყველა მოქალაქე სახლიდან გამოვალთ და ქუჩში დავდგებით, რეჟიმი გატყდება უცებ.
9. ნუ ელოდებით, რომ მხოლოდ მაშინ უნდა გახვიდეთ აქციაზე, როდესაც გარდატეხა ახლოსაა. პირიქით შეხედეთ: სანამ თქვენ არ გახვალთ, სანამ ყველა სინდისიერი მოქალაქე არ გავა, გარდატეხა არ მოხდება.
10. ამიტომ თუ ჯანმრთელობა საშუალებას გაძლევს და მომდევნო დღეებში ერთ აქციაზე მაინც არ გახვალ, მკვლელობაში მონაწილეობ. ქვეყნის და საკუთარი მომავლის, საკუთარი შვილების მომავლის მკვლელობაში.“
კომენტარები