ექსპრეზიდენტ მიხეილ სააკაშვილს, ემიგრაციიდან მხარდაჭერას უცხადებს შეიარაღებული ძალების თადარიგის სერჟანტი გიორგი კუხალეიშვილი.
მითხარით, რატომ აკეთებთ იმას, რაც პუტინს უხარია? თქვენ ის არა ხართ, ვინც პუტინს ებრძოდით მაშინ, როდესაც ჩვენი ქვეყნის მთავარსარდალი ეს ადამიანი იყო – მიმართავს კუხალეიშვილი თანამებრძოლებს და მოუწოდებს, თავიანთ ზემდგომებთან ხმა აიმაღლონ, შეასრულონ საკუთარი ვალდებულება და გადაარჩინონ ქვეყნის მთავარსარდლის, მიხეილ სააკაშვილის სიცოცხლე.
“მივესალმები ჩემს თანამებრძოლებს, პოლიციელებს და ყველას, ვისაც ფორმა აცვია. გეკითხებით თქვენ, ბატონებო, ვინ იყო ის ძალა, რომელიც ძალიან ბედნიერი იყო 1990-იან წლებში, როდესაც ჩვენი ხელით მოვკალით ქვეყნის პრეზიდენტი ზვიად გამსახურდია – ეს იყო რუსეთი. ვინ არის ძალა, რომელიც ძალიან ბედნიერია, როდესაც ხედავს, რომ ჩვენ ისევ ვკლავთ ჩვენი ქვეყნის მთავარსარდალს, მიხეილ სააკაშვილს? – ეს არის პუტინი. მაშინ მითხარით, რატომ აკეთებთ ამას, რატომ აკეთებთ იმას, რაც პუტინს უხარია? თქვენ ის არა ხართ, ვინც პუტინს ებრძოდით მაშინ, როდესაც ჩვენი ქვეყნის მთავარსარდალი ეს ადამიანი იყო. ღირსეულად ვებრძოდით, სიცოცხლის ბოლო წუთებამდე ვიბრძოდით დაუღალავად. ბევრმა ჩვენგანმა დავკარგეთ ძმა, ნათესავი, ოჯახის წევრი, სხეულის ნაწილები დავკარგეთ, მაგრამ იმისთვის, რომ შეგვენარჩუნებინა სახელმწიფოებრიობა, ტერიტორიები, ჩვენი მოქალაქეების სიცოცხლე .
დღეს რა გვჭირს ადამიანებო, როდესაც ხედავთ, რომ ქვეყნის პრეზიდენტს იგივე ძალა კლავს, და ამის თანამონაწილეები ვხდებით და ხმას არ ვიღებთ?! დღეს არ არის მიკიბულ-მოკიბული საუბრის დრო. თქვენი პირდაპირი მოვალეობაა და შეასრულეთ ეს მოვალეობა, გადაარჩინეთ მთავარსარდალი, მიხეილ სააკაშვილის სიცოცხლე. მიდით თქვენს უფროსებთან, თქვენს ზემდგომებთან და აიმაღლეთ ხმა. დაუფიქსირეთ პოზიცია, რომ ქვეყნის პრეზიდენტი, მიხეილ სააკაშვილი გადაიყვანონ მულტიპროფილურ კლინიკაში”,- ამბობს გიორგი კუხალეიშვილი
წყარო: მთავარი
კომენტარები