სტრასბურგის სასამართლოს გადაწყვეტილებას და ამ გადაწყვეტილების გარშემო არსებულ აზრთა სხვადასხვაობას სოციალურ ქსელში ეხმაურება განათლებისა და მეცნიერების ყოფილი მინისტრი კახა ლომაია.
ლომაია სტრასბურგის გადაწყვეტილების დადებით და უარყოფით მხარეებზე ამახვილებს ყურადღებას და წერს:
„სტრასბურგის სასამართლოს გადაწყვეტილების შესახებ…
პლიუსები – სასამართლომ:
1. საჩივარი წარმოებაში მიიღო. შეეძლო არ მიეღო.
2. ცნო საქმის პრიორიტეტულობა.
3. აღიარა მიხეილ სააკაშვილის შიმშილობის ფაქტი.
4. მთავრობას დაავალა უზრუნველყოს ციხეში მიხეილ სააკაშვილის უსაფრთხოება
5. მთავრობას დაავალა მიხეილ სააკაშვილისთვის გაწეული სათანადო სამედიცინო მომსახურების შესახებ ყოველდღიური ინფორმაციის მიწოდება.
მინუსი – სასამართლომ არ უპასუხა მიხეილ სააკაშვილის თხოვნას სამოქალაქო საავადმყოფოში მისი გადაყვანის თაობაზე.
კი არ “არ დააკმაყოფილა”, როგორც იუსტიციის მინისტრი ცრუობს, არამედ არ უპასუხა. ჯერჯერობით არ უპასუხა.
ნეიტრალური – სასამართლომ მიხეილ სააკაშვილს მოუწოდა შეწყვიტოს შიმშილობა.
პრეცენდენტების მიხედვით, ეს სასამართლოს სტანდარტული, ჰუმანური პრაქტიკაა.
პერსპექტივა – სასამართლო დაუბრუნდება საქმის განხილვას 24 ნოემბერს, იმ ინფორმაციის საფუძველზე, რომელსაც მიხეილ სააკაშვილის ადვოკატებისგან და მთავრობისგან მიიღებს,“- წერს კახა ლომაია.
ცნობისათვის, „სტრასბურგის სასამართლომ არ დააკმაყოფილა სააკაშვილის საჩივარი კერძო კლინიკაში გადაყვანასთან დაკავშირებით და მოსთხოვა შიმშილობის შეწყვეტა,“ – ეს ინფორმაცია, გუშინ, იუსტიციის მინისტრმა რატი ბრეგაძემ გაავრცელა.
მოგვიანებით, მიხეილ სააკაშვილის ადვოკატებმა განაცხადეს, რომ იუსტიციის მინისტრის მიერ გავრცელებული ინფორმაცია ტყუილი იყო და სინამდვილეში, ევროსასამართლომ სააკაშვილის მოთხოვნა, დროებითი ღონისძიების შესახებ, დააკმაყოფილა.
კომენტარები