როგორც ბრალდების მხარემ, მე მინდა გითხრათ, რომ ყველა იმ დაზარალებულს, მოგეხსენებათ, ათეულობით დაზარალებულია 7 ნოემბრის საქმეზე, მათ გასაგონად მინდა ვთქვა, რომ ჩვენ როგორც ბრალდების მხარე ყველაფერს გავაკეთებთ იმისთვის, რომ როგორც გიორგი უგულავამ, ისე ყველა სხვა ბრალდებულმა პირებმა კანონის მთელი სიმკაცრით აგონ პასუხი 7 ნოემბერს ჩადენილი დანაშაულებისთვის და რა თქმა უნდა, აღნიშნულ საქმეებზე პროცესები გაგრძელდება. ამის შესახებ პროკურორმა ჯარჯი წიკლაურმა განაცხადა.
მისი თქმით, 7 ნოემბრის ეპიზოდზე დღეს გამართულ მიხეილ სააკაშვილის სასამართლო პროცესზე ბრალდებული გიორგი უგულავა გამოცხადდა.
„ეს ადამიანი ბრალდებულია „ტელეიმედის“ დარბევის, 7 ნოემბრის და მათ შორის პატარკაციშვილის ოჯახისთვის ქონების დანაშაულებრივად წართმევის ეპიზოდებში. ჩვენ აღნიშნულ საქმეს ვიხილავთ არა ერთი წელია. 150 მოწმე დაიკითხა ამ საქმეზე, მათ შორის ის ადამიანები, რომლებიც დაარბიეს 7 ნოემბერს, ასევე ჟურნალისტები, რომლებიც სცემეს ტელევიზიაში, როდესაც „ტელეიმედი“ დაარბიეს. სწორედ ამ პროცესებს, სადაც მოწმეებს ვკითხავდით, უგულავა არ ესწრებოდა“, – აღნიშნა ჯარჯი წიკლაურმა.
პროკურორის თქმით, გიორგი უგულავა დღეს მიხეილ სააკაშვილის პროცესზე აკეთებდა უტიფარ განცხადებებს, შეურაცხყოფა მიაყენა სასამართლოს და ბრალდების მხარეს.
როგორც ჯარჯი წიკლაური აცხადებს, გიორგი უგულავას მიზანი არ ყოფილა მართლმსაჯულების პროცესში მონაწილეობა, მისი მიზანი იყო პოლიტიკური სანახაობის მოწყობა.
მისივე განმარტებით, შემდეგი პროცესიც ჩანიშნულია და პროკურატურა მზად არის ნებისმიერი ფორმით მიიღოს მონაწილეობა სასამართლო განხილვებში, ეს იქნება უშუალოდ ბრალდებულის მონაწილეობით, თუ დისტანციურად მისი ჩართულობით თუ სხვა.
„კარგია რომ მონაწილეობა უნდათ. ბრალდებულების უშუალო მონაწილეობით გამოვიკვლევთ ყველა იმ მტკიცებულებას, რომლებიც ადასტურებს 7 ნოემბერს მათ მიერ ჩადენილ დანაშაულებს“, – აღნიშნა ჯარჯი წიკლაურმა.
კომენტარები