საქართველოს მთავრობის გადაწყვეტილებას, იმ პენსიონერთათვის, ვინც ვაქცინაციას 1 იანვრამდე ჩაიტარებს, 200-ლარიანი ერთჯერადი საპენსიო დანამატის მიღების შესახებ, სოციალურ ქსელში ეხმაურება პუბლიცისტი თეიმურაზ ქორიძე.
„ახლა მოვუსმინე პრემიერ ღარიბაშვილის გამოსვლას, ვინც აიცრის, იმ 60 წელს გადაცილებული მოქალაქეებისთვის 200- ლარიანი საპენსიო დანამატის თაობაზე. ძალიან კარგია, ძალიან მიხარია, მაგრამ ერთი საბედისწერო კითხვა ამეკვიატა – ამ ხელისუფლებას ვინმე საღად მოაზროვნე მრჩეველი არა ჰყავს? – დავიჯერო ახლა, ვერავინ ხვდება, რომ ასეთი, ერთი შეხედვით, კეთილშობილური გადაწყვეტილება პენსიონერთა ერთი დიდი ნაწილის სამართლიან აღშფოთებას და ხელისუფლებისადმი უნდობლობის ახალ ტალღას გამოიწვევს. და სრულიად სამართლიანადაც!
გამოდის, ვინც უკვე აიცრა, ანუ ვინც შეგნებული და კანონმორჩილია, ის ხელისუფლებას ფეხებზე ჰკიდია, ხოლო ვინც უაზროდ პროტესტობს და დროშებს აფრიალებს, იმისი ეშინია და მის მოქრთამვას ცდილობს. არაფერს ვამბობ რეაქციულ ოპოზიციაზე, რომელიც ამას დაუყოვნებლივ სათავისოდ გამოიყენებს.
ცოტა ტვინი გაანძრიეთ, ბიჭებო და გოგოებო, ხელისუფლებაში!“- წერს პუბლიცისტი.
ცნობისათვის, მთავრობის აღნიშნული გადაწყვეტილება, დღეს საქართველოს პრემიერ-მინისტრმა გაახმოვანა.
„დღეიდან 200-ლარიან ერთჯერად საპენსიო დანამატს მიიღებს თითოეული პენსიონერი, რომელიც ვაქცინაციას პირველ იანვრამდე ჩაიტარებს. დანამატი გაიცემა პირველი აცრის გაკეთების შემდეგ,“ – განაცხადა ღარიბაშვილმა მთავრობის ადმინისტრაციაში გამართულ ბრიფინგზე.
კომენტარები