“სააკაშვილს მძევლად ჰყავს ხელისუფლება – ხელისუფლებამ ან უნდა “გააბანძოს” სააკაშვილი და ან მოკლას” – სარიშვილი

პოლიტიკოსი, ირინა სარიშვილი, “ტვ პირველთან” ამბობს”

“ამას არჩევნები არ ეწოდება, ეს არის ჩვეულებრივი რუსული ომი, რომელიც ხელისუფლებამ გამოუცხადა საკუთარ ქვეყანას და ამ ომის ეპიცენტრი გახდა პირველი ოქტომბრიდან მიხეილ სააკაშვილი, რომელიც სრულიად მშვიდობიანად ჩამოვიდა, ხაზგასმით აირჩია გზა რომელიც დაპირისპირებას არ გამოიწვევდა, ცხოვრობდა განცალკევებულად, უხმაუროდ მისცა საშუალება რომ დაეპატიმრებიათ და პატიმრობის პირველი დღიდან შიმშილობს, მას სასამართლო პროცესიც არ უტარდება, მიუხედავად იმისა, რომ მეცხრე წელია დღევანდელი ხელისუფლება მას ადანაშაულებს ყველაფრისთვის, რა საშინელებაც დედამიწის ზურგზე მომხდარა და სასამართლო პროცესისთვის მაინც უნდა ყოფილიყვნენ მზად. უმძიმესი ვითარება გვაქვს.

ეს არაფერი იქნებოდა ახლა, ადგილობრივ არჩევნებს არც ამდენი აჟიოტაჟი მოჰყვებოდა, რომ არა სააკაშვილის ჩამოსვლა და ჩაჯდომა, დავარქვათ ყველაფერს თავისი სახელი…

კერძო კლინიკაში გადაყვანას ჩვენ ვითხოვთ, თორემ, სააკაშვილს მგონი, ამ ეტაპზე კერძო კლინიკაც აღარ აინტერესებს. ხელისუფლების მიზანი არის მარტივი და ცუდი – შენარჩუნდეს რუსული ხელისუფლება საქართველოში და ამისთვის მიდის ყველაფერზე, ამიტომაა ეს მდგომარეობა ძალიან საშიში.

სუფთა ადამიანურადაც, უპირველესი პრობლემა მისი ჯანმრთელობის პრობლემაა, დღევანდელი ხელისუფლება შეგნებულად მიდის მკვლელობაზე.

მიხეილ სააკაშვილი არის ციხეში და იქედან მძევლად ჰყავს აყვანილი ფსიქოლოგიურად დღევანდელი ხელისუფლება – ხელისუფლებამ ან უნდა “გააბანძოს” სააკაშვილი და ეს არ გამოდის და ან ფიზიკურად გაანადგუროს. ამიტომ ვართ მძიმე მდგომარეობაში.”