პრემიერმინისტრი ირაკლი ღარიბაშვილი კრიტიკული მედიის წარმომადგენლებს კვლავ თავს ესხმის.
საარჩევნო უბანზე ხმის მიცემის შემდეგ, ღარიბაშვილს “მთავარი არხის” ჟურნალისტმა დეა მამისეიშვილმა სახელმწიფო უსაფრთხოების სამსახურის მიერ გუშინ დაწყებულ გამოძიებასთან დაკავშირებით ჰკითხა – რატომ ემთხვევა მსგავსი გამოძიებების დაწყება ყოველთვის წინასაარჩევნო პერიოდს და რატომ არასდროს ხდება მისი დასრულება.
“ალბათ ვერავინ წარმოიდგენდა, რომ დამნაშავე სააკაშვილი, ყოფილი პრეზიდენტი, რომელიც ქვეყანას 9 წელი მართავდა, ქურდულად, მალულად შემოიპარებოდა ერთდაერთი მიზნით, რომ აქ მოეწყო რევოლუცია და ქაოსი. ეს მოხდა. ადამიანებს არავითარი ლიმიტი არ გააჩნიათ, მათ ჰქონდათ ასევე დაგეგმილი მკვლელობებიც. ჩვენმა სამსახურებმა ყველაფერი გააკეთეს და მოახდინეს პრევენცია”, – თქვა კითხვის პასუხად ღარიბაშვილმა.
დამატებით კითხვებზე, მათ შორის იმაზე, აქვს თუ არა კონკრეტული მტკიცებულებები გამოძიებას, ღარიბაშვილმა პასუხის გაცემა აღარ მოისურვა და ტრადიციულად, ჟურნალისტის შეურაცხყოფაზე გადავიდა.
“ზრდილობა იქონიეთ. თქვენ ხართ ჩვეულებრივი მოძალადე ახლა, პროვოკატორი ხართ. სირცხვილია”, – მიმართა ღარიბაშვილმა ჟურნალისტს.
კომენტარები