რატომ არ აღძრა უკრაინამ სააკაშვილის წინააღმდეგ საქმე საზღვრის უკანონო გადაკვეთის ფაქტზე? – ვალერია ლუტკოვსკაია

რატომ არ აღძრა აქამდე უკრაინამ მიხეილ სააკაშვილის წინააღმდეგ საქმე საზღვრის უკანონო გადაკვეთის საქმეზე? ამის შესახებ უკრაინელმა პოლიტოლოგმა ვალერია ლუტკოვსკაიამ უკრაინული ტელეკომპანია „ნაშ“-ის ეთერში განაცხადა.

„ჩემთვის აბსოლუტურად გაუგებარია, რატომ არ აღძრა აქამდე უკრაინამ მიხეილ სააკაშვილის წინააღმდეგ საქმე საზღვრის უკანონო გადაკვეთის საქმეზე? არც ის ვიცი, აპირებენ თუ არა შესაბამისი ორგანოები ასეთი საქმის აღძვრას? ანუ რა ხდება – ეს ხომ არ ნიშნავს, რომ ვიღაცისთვის ჩვენთან კანონი მოქმედებს და ვიღაცისთვის არ მოქმედებს? მათ შორის, საზღვრის დარღვევის შემთხვევაში? ეს ძალიან ცუდია. ნორმალურ სამართლებრივ სახელმწიფოში ეს ყოვლად დაუშვებელია“, – განაცხადა ვალერია ლუტკოვსკაიამ.

თავის მხრივ, უკრაინელმა ექსპერტმა ლეონიდ შვეცმა განაცხადა, რომ მიხეილ სააკაშვილმა უკრაინის საზღვარი იმ პირობებში დაარღვია, როდესაც ის უკრაინის ხელისუფლებაში ოფიციალურ თანამდებობას იკავებდა.

„რაც არ უნდა ერქვას იმ უწყებას, რომელსაც სააკაშვილი უკრაინაში ხელმძღვანელობდა, როდესაც საზღვარზე უკანონოდ გადადიოდა, ის არ იყო უკრაინის რიგითი მოქალაქე, ის უკრაინის ოფიციალური თანამდებობის პირი, ჩინოვნიკი იყო. ამ სახით საქართველოში ჩასვლით მან უხერხულ მდგომარეობაში ჩააყენა როგორც ოფიციალური საქართველო, ასევე, ოფიციალური უკრაინა. როგორ მოხვდა სააკაშვილი საქართველოში, ეს ერთი საკითხია, მაგრამ მან ხომ კიდევ უკანონოდ გადაკვეთა უკრაინის საზღვარი, ანუ იქ არის ორი ვარიანტი – ან საზღვარზე ვიღაცას ქრთამი მისცეს, ან ამაზე უბრალოდ თვალი დახუჭეს და გაატარეს უკრაინის ოფიციალურმა სტრუქტურებმა“, – განაცხადა ლეონიდ შვეცმა.

წყარო – pia.ge