“ეძებდნენ ფულს და კიდევ რაღაცას. ალბათ ფიქრობდნენ რომ სააკაშვილისთვის ფული მიმქონდა” – ყაზახი ბიზნესმენი

ყაზახი ინვესტორი და ბიზნესმენი, რომელიც მიხეილ სააკაშვილთან ნაცნობობის გამო საქართველოში არ შემოუშვეს, ფეისბუქზე პოსტს აქვეყნებს.

მარგულან სეისემბაევი წერს, რომ მას შემდეგ რაც საქართველოში არ შემოუშვეს, სტამბოლში ჩაფრინდა, თუმცა აეროპორტის პოლიციის განყოფილებაში წაიყვანეს, სადაც ინტერპოლის ბაზებში რაღაცას ეძებდნენ. თბილისის აეროპორტში კი მისი ცოლ-შვილი 3-4 საათით შეაყოვნეს და ბარგს გამალებით ჩხრეკდნენ.

„ეძებდნენ ფულს და კიდევ რაღაცას. ალბათ ფიქრობდნენ რომ სააკაშვილისთვის ფული მიმქონდა ან რაიმე წერილი. გაჩხრიკეს მეუღლისა და ბავშვების ბარგიც. საქართველო საბჭოთა კავშირში დაბრუნდა. ადამიანის უფლებები იქ უკვე ცარიელი სიტყვებია. სპეცსამსახურები და პოლიცია აღარ არის კეთილი და მეგობრული, როგორც ეს სააკაშვილის დროს იყო, თუმცა ძალიან ბევრი ადამიანი მწერს საქართველოდან და ბოდიშს იხდის საკუთარი ხელისუფლების საქციელის გამო, დახმარებას მთავაზობს და მხარდაჭერას მიცხადებს. საქართველო ჩემთვის ისევ მშვენიერი ქვეყანაა მშვენიერი ადამიანებით და ეს დროებითი სირთულეებიც გაივლის“- წერს ყაზახი ბიზნესმენი.