“ოცნების” მერობის კანდიდატმა თელავში, დებატებზე უარი თქვა – ჟურნალისტი განმარტავს, რატომ დატოვა ტელევიზია

თელავის ადგილობრივი ტელევიზიის “თანამგზავრის” ყოფილი ჟურნალისტი Facebook-ზე წერს, რომ თელავში ქართული ოცნების მერობის კანდიდატი დებატებს არ დათანხმდა და ცალკე ბლოკში, პირველ ნაწილში მოითხოვა დაჯდომა, რაზეც ჟურნალისტი ტელევიზიის ხელმძღვანელთან ვერ შეთანხმდა. შედეგად, გადაცემა მისი სურვილის საწინააღმდეგოდ სხვამ წაიყვანა.

ჟურნალისტი წერს, რომ მან პროტესტის ნიშნად სამუშაო დატოვა.

“ჩემო მეგობრებო და კოლეგებო, პირველ რიგში, დიდი მადლობა თანაგრძნობისთვის და მხარდაჭერისთვის. მთავარი ისაა, რომ მე დღემდე ძალიან მიყვარს ტელეკომპანია ,,თანამგზავრი”, რომელიც მთელი ამ წლების განმავლობაში თავისუფლების სადარაჯოზე იდგა, სადაც ყოველთვის მოდიოდა და მოდის, როგორც ხელისუფლება, ასევე, ოპოზიცია და ამიტომ ეს ტელევიზია, მისი ხელმძღანელობა და ჩემი კოლეგები ტალახის სროლისთვის არ მემეტებიან. ყოველთვის ტელეეკრანზე ვერ ვიქნები, არაუშავს… რაც შეეხება ამ შემთხვევას, სოციალურ ქსელში იმდენი ტყუილ-მართალი იწერება, გადავწყვიტე, რომ განმარტება გავაკეთო: 1. მე ტელევიზიიდან არავის გამოვუგდივარ, საკუთარი ნებით წამოვედი; 2.გუშინდელი გადაცემა, რომელიც ჩემ მიერ მომზადდა, არავითარი პროექტის ფარგლებში არ კეთდებოდა და თუ ეთერში არ გავიდოდა, არანაირ სოლიდურ ჯარიმას არ ითვალისწინებდა; 3.- მერობის სახელისუფლებო კანდიდატი დებატებს არ დათანხმდა და ცალკე ბლოკში, თან აუცილებლად პირველ ნაწილში მოისურვა დაჯდომა, რაზეც მე ვუპასუხე, რომ თუ ვინ რომელ ბლოკში დაჯდებოდა, ეს კენჭისყრას უნდა გადაეწყვიტა, როგორც სხვა საარჩევნო გადაცემების დროს (ვთვლი, რომ ეს ელემენტარული ჟურნალისტური პრინციპია, რომელსაც ყველა ჟურნალისტი უნდა იცავდეს). ეს სწორედ ის საკითხია, რაზეც ტელევიზიის ხელმძღვანელთან ვერ შევთანხმდი. შედეგად, გადაცემა ჩემი კითხვებით, სხვა წამყვანმა, ჩემი სურვილის საწინააღმდეგოდ წაიყვანა, რის გამოც, პროტესტის ნიშნად, ტელევიზიიდან წამოვედი. სულ ესაა”,-წერს ნატალია მეგუთნიშვილი.