არ ან ვერშემდგარი ერთობა – რატომ არ იძებნება ნიკა მელიას გვერდით თაკო ჩარკვიანის ადგილი?

თაკო ჩარკვიანისა და ნიკა მელიას ერთობა სავარაუდოდ არ ან ვერ შედგა. ობიექტურობისთვის უნდა აღინიშნოს, რომ თაკო ჩარკვიანს ჰქონდა ამის მცდელობა, თუმცა რეალობა სხვა არის.

ნიკა მელია აშკარად არიდებს თავს მასთან ერთობლივ ბრძოლას და ამის პირველი ნიშანი მაშინ გამოჩნდა, როდესაც 10 ოქტომბერს, რუსთაველის გამზირზე, მიხეილ სააკაშვილის მხარდამჭერ აქციაზე არ მივიდა, რაც  გზავნილი იყო იმისა, რომ მელიას  არ სურს ჩარკვიანის პოლიტიკურ წილში ყოფნა.

პოლიტიკური სიცივე ყოველთვის იგრძნობოდა ნიკა მელიას მხრიდან, როდესაც თაკო ჩარკვიანის შემართებასა და მოწოდებებს ის ცალყბად ეხმიანებოდა და არა როგორც ერთ-ერთ ლიდერად, არამედ რიგით მებრძოლად აღიქვამდა. არც მაშინ გამოუხატავს დიდი მხარდაჭერა, როდესაც მან, მიხეილ სააკაშვილის დაბრუნების ორგანიზაცია დააფუძნა და მხარდამჭერთა მობილიზებას ცდილობდა.

თაკო ჩარკვიანმა, მელიას დამოკიდებულება მის მიმართ, რა თქმა უნდა დაინახა და მიანიშნა კიდეც 10 ოქტომბრის აქციაზე, როდესაც უთხრა, რომ მან გამოცდა ჯერ ვერ ჩააბარა და თბილისელებმა 2-იანის დაწერაც იციან, ესეც საპასუხო გზავნილი იყო, რომ მათ შორის, რაღაც ისე ვერ არის.

14 ოქტომბრის აქციაზე, რომელიც ასევე, მიხეილ სააკაშვილის მხარდასაჭერად გაიმართა, თაკო ჩარკვიანი არც სიტყვით გამოსულა და არც ლიდერებს შორის ყოფილა, ის რიგით მონაწილედ მივიდა და მხოლოდ მედიასთან კომენტარით შემოიფარგლა. არ ვიცით, იყო ეს თავად ჩარკვიანის გადაწყვეტილება, თუ ნიკა მელიამ არ მისცა სიტყვით გამოსვლის საშუალება, თუმცა ფაქტია, რომ ისინი ერთ ველზე ვერ თამაშობენ და ამას, თავად მელია უშლის ხელს.

და ბოლოს, 20 ოქტომბერს, ნიკა მელიამ წარმოადგინა კოალიციური გუნდი, რომელიც თბილისის მერის არჩევნებში გამარჯვების შემთხვევაში, მასთან ერთად მართავს დედაქალაქის მთავრობა, თუმცა, ვერც აქ ვიხილეთ თაკო ჩარკვიანი.

ე.წ ჩრდილოვანი კაბინეტის წარდგენას კი ის სოციალურ ქსელში, ირიბი კრიტიკითა და მინიშნებით გამოეხმაურა.

“ღმერთო როგორ მეცოდება ეს ლამაზი ქვეყანა – ხალხი, მართლა გული მიკვდება,
ქვეყანა აღარ არის, პირდაპირ ქარვასლაა., სამარცხვინო ქარვასლა.
ნუ, ეს არის რაც არის”– წერს ჩარკვიანი.

კომენტარში კი ერთ-ერთმა მომხმარებელმა მიუთითა, რომ ახლა არ არის კრიტიკის დრო, რაზეც ჩარკვიანმა ცივად უპასუხა: “რისი დროა მე გავარკვევ”.

ამ ეტაპზე, რაც ჩანს, არის ის, რომ ნიკა მელია, სულ სხვა დღის წესრიგით მოქმედებს და თაკო ჩარკვიანი მისთვის მსხვილი პოლიტიკური კალიბრის ფიგურა არ არის

გამოთქვამს თუ არა ღია პროტესტს ჩარკვიანი და გამოეყოფა თუ არა ოპოზიციურ ერთობას, ეს ჯერ არ ვიცით.  სავარაუდოდ, მეორე ტურის დასრულებამდე, ის შეეცდება, ნაკლებად კრიტიკული იყოს და საბოლოო გადაწყვეტილებას, ალბათ არჩევნების შემდეგ მიიღებს.

multimedia.ge