იტალიის რესპუბლიკასთან ფრენების დროებით შეჩერების შედეგად იტალიაში დარჩენილი საქართველოს ის მოქალაქეები, რომლებსაც მომდევნო 2 კვირის განმავლობაში უკან დასაბრუნებელი ბილეთები გაუუქმდათ, საქართველოში ახლო მომავალში დაბრუნდებიან.
მათ გამომგზავრებას საქართველოს მთავრობა უზრუნველყოფს. უკვე დამუშავებულია ყველა იმ მოქალაქის მონაცემი, ვინც შესაბამისი გადაწყვეტილების გამოქვეყნების შემდგომ, იტალიაში საქართველოს საელჩოს მიმართა.
საგარეო სამინისტროს, მინისტრის მოადგილის, ალექსანდრე ხვთისიაშვილის განცხადებით, შეგროვებულია ინფორმაცია საქართველოს ყველა იმ მოქალაქესთან დაკავშირებით, რომელთა ტრანსპორტირებაც უახლოეს მომავალში იტალიიდან საქართველოში მოხდება.
„შეგროვებულია ინფორმაცია საქართველოს ყველა იმ მოქალაქებთან დაკავშირებით, რომელთა ტრანსპორტირებაც მოხდება უახლოეს მომავალში იტალიიდან საქართველოში. ეს მონაცემები დამუშავებულია შესაბამისი სამსახურების მიერ და მიმდინარეობს ამ ადამიანებთან მუდმივი კომუნიკაცია და კავშირი. საქართველოს საელჩომ უზრუნველყო მოქალაქეები შესაბამისი პირველადი საჭიროების ნივთებით. რაც შეეხება იმ ადამინებს, რომლებიც იტალიის ჩრდილოეთში, დახურულ რეგიონებში იმყოფებოდნენ, საქართველოს საელჩომ იტალიის მხარის თანაორგანიზებით უზრუნველყო შესაბამისი ნებართვები და დერეფნები ამ ადამიანებისთვი, ნაწილი მათგანი უკვე არის რომში, მეორე ნაწილი მიემგზავრება რომის მიმართულებით და უახლოეს მომავალში , როგორც აღვნიშნეთ, გადმოყვანილი იქნებიან იტალიის რესპუბლიკიდან საქართველოში შესაბამისი პროტოკოლის დაცვით და ეს ადამიანები შემოწმდებიან საქართველოში ჩამოსვლისთანავე,“- განაცხადა მინისტრის მოადგილემ ალექსანდრე ხვთისიაშვილმა.
უწყების ცნობით, საქართველოს მოქალაქეები რომში შეიკრიბებიან, საიდანაც მოხდება მათი გამომგზავრება. აღსანიშნავია, რომ საქართველო ერთ-ერთი პირველი ქვეყანაა, ვინც იტალიასთან ფრენების შეჩერების შემდგომ საკუთარი მოქალაქეები გამოჰყავს.
მათი გამომგზავრება კი, საქართველოში ჯანდაცვის საერთაშორისო ორგანიზაციის მიერ დადგენილი პროტოკოლით მოხდება. საქართველოს საელჩო ყველა მათგანთან მუდმივ კავშირზე რჩება, მოქალაქეები უზრუნველყოფილნი არიან პირველადი საჭიროების ნივთებით.
კომენტარები