„როცა ადამიანები იღუპებოდნენ და შველას ითხოვდნენ, ესენი კაბინეტებში დოკუმენტებს აწესრიგებდნენ…“ – ზურა ბაუჟაძე

ჟურნალისტი ზურა ბაუჟაძე ფეისბუკში პოსტს აქვეყნებს და ბათუმში 8 ოქტომბერს, საცხოვრებელი კორპუსის ჩამონგრევის ტრაგედიას ეხმაურება. 

მისი თქმით, დამნაშავის ძებნა „ზემოდან უნდა დაიწყონ“.

„როგორც კი ფანჯრის გამოცვლას დააპირებ ბათუმში ზედამხედველობის სამსახური ეგრევე დაგადგება თავზე.
ამ სახლის სარემონტო სამუშაოების შესახებაც საქმის კურსში იყვნენ, მოსახლეობამ გააპროტესტა, მაგრამ მერიამ „დაიკიდა“.

ტრაგედიის შემდეგ დაფაცურდნენ და სასწრაფოდ დაიწყეს დოკუმენტაციის მოწესრიგება ანუ როცა ადამიანები იღუპებოდნენ და შველას ითხოვდნენ ესენი კაბინეტებში ფაცხაფუცხით დოკუმენტების მოწესრიგებას ცდილობდნენ. საკუთარი ტყავის გადარჩენაზე ზრუნავდნენ.

შვიდი კორპუსი ისე აშენდა ქალაქში არ ვიცოდითო, სახლს საძირკველი გამოუთხარეს და არ ვიცოდითო,
იმ ლეოგრანდშიც, სადაც 14 ადამიანი ამობუგეს, იქ ხომ იცით რომ ახლაც კაზინო და სასტუმროა და არც მდგომარეობა შეცვლილა?

ეს ხომ იცით?

იქ სადაც იცოდით, იქ რა გააკეთეთ?….

დამნაშავის ძებნა დაიწყეთ ზემოდან. პირველი არის პარლამენტი, რადგან კანონმდებლობა მშენებლობასთან დაკავშირებით არის აბსურდული და გაუმართავი.

მეორე უსაფრთხოების ნორმატივები, რომლებიც სადღაც წერია და ახლა რომ მოძებნოთ უცებ ვერც იპოვით.

მესამე ქალაქის მერი და მერია, რომელიც წლებია ხედავს და ხედავდა სამშენებლო ქაოსს ქალაქში და არაფერს აკეთებდა (ნუ გაისულელებთ თავს, ყველამ ვიცით რომ ფულს აკეთებდნენ).

უამრავი განცხადებაა მერიაში შესული სადაც მოქალაქეები მიშენება-დაშენებას აპროტესტებენ და აღკვეთას მოითხოვენ, მაგრამ ვინმემ მიაქცია ყურადღება?

მეოთხე, ზედამხედველობის სამსახური, რომლის საქმიანობის დოკუმენტაციას თუ გაეცნობით უცებ დაინახავთ, რომ ვიღაცას ფანჯრის შეცვლის მცდელობა აღუკვეთეს, ვიღაცას კი რეკლამის აბრა ჩამოახსნევინეს. სერიოზული და საშიში მიშენება-გადაკეთებები კი „არ დაუნახავთ“.

ყველა დანარჩენი ამათგან გამომდინარეობს. ამ ზემოთ ჩამოთვლილთა უნიათობის ბრალია“,- წერს ბაუჟაძე.

„დაიჯესტი“