კორონავირუსის საფრთხის გამო, რომის პაპი ლოცვას ონლაინ რეჟიმში ჩაატარებს

ახალი კორონავირუსის გავრცელების საფრთხის გამო, რომის პაპი ლოცვას ონლაინ რეჟიმში ჩაატარებს. ამის შესახებ შესაბამისს ინფორმაციას ვატიკანი აქვეყნებს.

გავრცელებული ინფორმაციის თანახმად, ეს 15 მარტამდე გასტანს.

იტალიის ჯანდაცვის სამინისტროს მიერ გავრცელებული ინფორმაციის მიხედვით, 7 მარტის მონაცემებით, ქვეყანაში COVID-2019 ტიპის ახალი კორონავირუსით ინფიცირების 5 061 დადასტურებული შემთხვევის შესახებაა ცნობილი, მათგან უმრავლესობა ლობარდიაში ფიქსირდება. ვირუსის შედეგად გარდაცვლილთა რაოდენობა კი 233-ს შეადგენს.

ცოტა ხნის წინ გავრცელდა ინფორმაცია, რომ კორონავირუსის გავრცელების გამო, იტალიის მთავრობა ლომბარდიაში გამკაცრებულ კარანტინს აპირებს. „გარდიანი“ წერს, რომ ჯარიმა დაემუქრება ყველას, ვინც ლომბარდიაში შესვლას ან იქიდან გამოსვლას სპეციალური ნებართვის გარეშე ეცდება.

მედიის ცნობით, ლომბარდიის დახურვა სამ აპრილამდე იგეგმება. ამ პერიოდის განამვლობაში გაუქმდება ყველა მასობრივი ღონისძიება. აიკრძალება მათ შორის ქორწილები, დაკრძალვის ცერემონიები და რელიგიურ რიტუალებზე შეკრებები.

ლომბარდიაში სულ ათი მილიონი ადამიანი ცხოვრობს, რაც იტალიის მოსახლეობის მეექვსედს შეადგენს.