“დეპუტატი ტელევიზიის ეზოში იდგა და პამპერსით ხელში ელოდებოდა კოლეგას, ის სახლში არ მიდის და ეს გარეთ ვერ გადის” – რა ისტორიას იხსენებს ბონდო მძინარაშვილი

ჟურნალისტი, პირველ არხის სამეურვეო საბჭოს წევრი, ბონდო მძინარაშვილი:

“2003 წელს ტელეკომპანია “მზის” გადაცემაში “ღამის მზერა” ვიყავით მაშინდელი ხელისუფლების წარმომადგენლები და ოპოზიციონერები.

დეპუტატებს შორის დებატები ისე გამწვავდა, რომ ასაკოვანმა მამაკაცებმა ერთმანეთს წარსული, ახალგაზრდობის ცოდვები წამოაძახეს. ერთ-ერთი ძალიან გაბრაზდა და ოპონენტს დაემუქრა, – გადაცემა რომ დამთავრდება, პამპერსი უნდა ჩაგაცვაო. და გადაცემის დასრულებისთანავე გარეთ გავარდა. ჩვენ სტუდიაში ვსაუბრობდით ეთერს მიღმა და თან მიკროფონებს ვიხსნიდით. კაცმა რომ თქვას, სერიოზულად არც მიგვიღია ეს მუქარა.

ცოტა ხანში შეშფოთებული პროდიუსერი შემოვიდა, – მართლა პამპერსი მოუტანია და ტელევიზიის ეზოში ელოდებაო. არ ვიცი, ის პამპერსი შვილიშვილებისთვის ჰქონდა ნაყიდი, სულ მანქანით დაჰქონდა თუ მისმა თანმხლებმა თანაპარტიელებმა მოუტანეს, მაგრამ ხელში პამპერსით კი ელოდებოდა ოპონენტსა და კოლეგას.

ახლა როგორი სიტუაციაა: ის დეპუტატი ეზოშია, ეს დეპუტატი შენობაში და ჩვენ, ბუნებრივია, ამათ პირისპირ ვერ დავტოვებთ. ის არ მიდის სახლში და ესეც ვერ გადის გარეთ.

შინაგან საქმეთა მინისტრს დავურეკე და ვითარება გავაცანი. გაიცინა. – რა გაცინებს, კაცო, ვინმე გამოუშვი, ახლა აქ კონცერტის გამართვის დრო არ არის მეთქი. – ახლავე მოვლენო.

მართლაც, რამდენიმე წუთში მოვიდნენ საბურთალოს პოლიციის ოპერატიული თანამშრომლები და ის პამპერსიანი დეპუტატი იქაურობას გაარიდეს, ეს პამპერსს გადარჩენილი დეპუტატი კი შინ წავიდა. კი არ გაიპარა, ჩვეულებრივად წავიდა. მანამდე კი ამბობდა, – არ მინდა, ჩემი შვილი ჩავრიო ამ ამბავში, თორემ გარეთ მელოდებაო.

ინგა გრიგოლია, გახსოვს ეს ისტორია? გვარებს საგანგებოდ არ ვწერ.

აბა, მითხარით: მე, პრეზიდენტის პრესსამსახურის წარმომადგენელი, უფრო გავლენიანი ვიყავი მაშინ თუ ევროკავშირის ელჩი – ახლა?”